Danskit suliffeqarfiutaata Pituffimmi sakkutooqarfimmi suliassaq angisooq pissarsiarigaa
Danmarkimimi entreprenøritut suliffeqarfik suliariumannittussarsiuussinermi ajugaaqqammerpoq sakkutooqarfiullu mittarfia asfaltilersortussanngorlugu. Aviisi Børsenimi taama allaaserisaqarpoq.
Suliffeqarfimmik piginnittoq tassaavoq Nyborgimiu Hans Christian Munck, pingaarnertullu naalagaaffiup aqqusernginut pisortaqarfia sullillugu aqqusinernik asfaltilersuinermik allanillu suliaqartuuvoq siornalu 1,7 milliardit koruuninik kaaviiaartitaqarluni. Kingullertigullu Munck-gruppen Pituffimmi sakkutooqarfiup mittarfiata nutarternissaanut 130 millionit koruuninik naleqartumut suliariumannittussarsiuussinermi ajugaavoq.
- Sulisorpassuagut piffissami kingullermi sakkussanik atortussanillu poortuillutik ulappupput, nassiussassat siulliit nassiunneqarniassammata, nassiussassat sinneri aappaagu juulip aallaqqaataata missaani nassiunneqarumaarput, Munck Asfaltip nittartagaani taama allassimavoq.