Danskit sakkutuut 100-it sinneqartut Irakimit anisikkallarneqartut
Ministeriuneq Mette Frederiksen tusagassiortunut pingasunngornermi katersortitsinermini taama oqarpoq. Sakkutuut Iranip sanilianut Kuwaitimut nassiunneqarallarput.
Iranimiut Irakimi sakkutooqarfiit danskinik 133-nik sakkutoortaqartut Al Asad-basenimiittut unnuaq saassussiffigereeraallu ministeriuneq taama nalunaaruteqarpoq.
AAMMA ATUARUK Irakimi sakkutooqarfik Iranimiunit saassunneqartoq
- Sillimaniarneq annertunerpaaq atorsinnaasarput tamaat atorlugu sakkutoortagut illersorneqassapput. Aalajangiupparpullu sakkutuut Kuwaitimut nuutsikkallarneqassasut. Tamatullu aalajangerallarneq pingaaruteqarpoq, Mette Frederiksen oqarpoq.
Sakkutuut Kuwaitimukaakkallarneqartut sungiusaasortai 30-40 missaanniittut Al Asad-basenimut uterteqqinneqassasut Mette Frederiksenip ilanngullugu oqaatigaa.
Amerikamiut Qassem Soleimani dronimik qaartartumeeralutik toqummagu maanna Iranimiut taama qisuariaateqarput.
AAMMA ATUARUK Tysklandip Irakimi sakkutuuni angerlartittussanngorai
Amerikamiut dronimik saassussiniarlutik aalajangersimanerat Mette Frederiksenimit immikkut isummerfigineqarusunngilaq.
- Taamaaliortoqarneranut tunngatillugu Danmarki pisortatigoortumik akuliuttariaqanngitsoq isumaqarpunga. Tamanna suleqatigisagut peqatigalugit inimi matoqqasumi eqqartorumaarparput, taanna oqarpoq.
Irakimi naalagaaffiup sapaammi aalajangerpaa, Irakimut attuumassuteqanngitsut Irakimit anisinneqarnissaat.
AAMMA ATUARUK Soleimanip kingoraartaata USA-mut akiniaanissartik neriorsuutigigaa
Nunat assigiinngitsut akornanni sakkutuut Irakimiitiinnarneqarnissaat Mette Frederiksenilli naatsorsuutigaa.
- Irakimiut ISIL-imut akiuiniarnerannut tunngatillugu maannamut suleqatigiinnerput ajunngitsumik ingerlalluarpoq. Ajunngitsumillu suleqatigiiginnarnissarput naatsorsuutigaara, taanna oqarpoq.
