- Sungiusarneq isertuaalluinnartumik ingerlavoq, immat atorneqarneranni nunat tamalaat akornanni inatsisit malinneqarput, danskit nunanut allanut ministeriat Jeppe Kofod (S) oqarpoq.Assi: Arctic Circle/flickr

Danskit sakkutuuisa timmisartuat Ruslandip Issittumi soqutigisaqarfiani sungiusartoq

Sakkutuut imarsiortut USA-meersut, Tuluit Nunaanneersut Norgemeersullu Barentshavetimi imartaq Ruslandip soqutigisaqarfia ilaatigut qulaallugu sapaatit-akunnerata massuma ingerlanerani sungiusarmata, Danmark annertunngikkaluartumik aamma peqataatitaqarpoq.

Danmarkip sungiusarnermi peqataatitaa tassaavoq timmisartoq nakkutilliissut. Timmisartup assilisai sungiusarnermi atorneqarput.

Ruslandilli aqqartartuisa Barentshavetimut ungasinngitsumi Kolap qeqertaasaani inissisimaffiisa pingaarnersaasa ilaannut qanittumi sungiusarnermi Danmarkip peqataanera, Ruslandip arajutsisimassanngikkaa ilimagineqarpoq.

USA-p sakkutuui imarsiortut, 1980-ikkunnili taamaaliorsimallutik ukioq manna maajimi Barentshavetiliartitsimmata Ruslandimit qisuariarfigineqarpoq, sakkutuut umiarsuaat sungiusarnermik malinnaasussat avalatsinneqarlutik.

Norgemi illersornissaqarfiup qitiusumik aqutsisoqarfiata pisortaa Rune Jakobsen, kingorna oqarpoq, Norge maajimi sungiusarnermi peqataatitaqarumanngitsoq, Issittumi pissutsinik qajannarsisitsiniannginnamik.

- USA-mi illersornissaqarfik, nunalluunniit iligisat allat peqatigalugit Ruslandip aqqartartunut Kolap qeqertaasaani inissisimatitsiffiisa avataani sungiusarnermut peqataagutta najummassimanartorsiortitsinerulersinnaavugut.

- Ruslandimiut tamanna uumisaarinertut isigisinnaavaat, Rune Jakobsen, aviisimut VG-mut juulimi oqarpoq.

Pissutsilli qaammatit marluk ingerlaneranni allanngorsimagunarput, Norgemi Danmarkilu sungiusarnermut maanna peqataatitaqarput.

Kofod: Peqataanissarput pissusissamisuuginnarpoq

Danmarkip nunanut allanut ministeria Jeppe Kofod Danmarkip sungiusarnermi peqataatitaqarnera pillugu Folketingip nunanut allanut tunngasunut aalajangiisartoqatigiivinut sisamanngornermi nassuiaateqarpoq.

Qanoq nassuiaateqarsimanersoq isertuussaavoq, Danmarkilli Barentshavetimi sungiusarnermi peqataatitaqarnerata pissutsinik arlaatigut sakkortusaagunarnavianngitsoq kingorna oqarpoq. Barentshavet Ruslandip aningaasarsiorneranut immikkut pingaarutilittut inissisimavoq.

- Sungiusarneq isertuaalluinnartumik ingerlavoq, immat atorneqarneranni nunat tamalaat akornanni inatsisit malinneqarput.

- Nunaavugut imarsiornermik pingaartitsisoq, sungiusarnermullu peqataanissarput pissusissamisuuginnarpoq. Immakkut angallannermi kiffaanngissuseqarnissaq aamma pingaaruteqarpoq, Jeppe Kofod oqarpoq, sukumiinerusumilli oqaaseqarnissaminut tunuarsimaarluni.

Imartap nunap sineriallip aningaasarsiornerani immikkut pingaaruteqartutut inissisimanera ima paasineqassaaq: Pissuussutit suulluunniit imartami tassani nassaassaasut, imaani naqqanilu pissuussutit, nunap pineqartup kisimiilluni oqartussaaffigivai.

Paatsoorneqarsinnaasumik takutitsisoq

Partii Enhedslisten sinnerlugu nunanut allanut tunngasunut oqaaseqartartoq Eva Flyvholm, Folketingip nunanut allanut tunngasunut aalajangiisartoqatigiivini ilaasortaavoq ataatsimeeqataallunilu. Danmarkip sungiusarnermi peqataatitaqarnermigut Ruslandip Issittumi soqutigisaanut atatillugu paatsoorneqarsinnaasumik takutitsisoq, taanna isumaqarpoq.

- Pissutsit najummassinarsileruttorfianniippugut, iliuuseriniakkavullu eqqarsaatigilluaqqaartariaqarpavut, Eva Flyvholm oqarpoq.

- Sungiusaqataanerup pissutsinik qajannarsisitsineruinnarnissaa ernummatigineqarsinnaavoq, sungiusarnermullu taamaattumut peqataanissaq eqqarsaatigilluaqqaarneqartariaqarpoq. Uanga allallu isumaqarpugut peqataasariaqanngitsugut, taanna oqarpoq.

Amerikamiut timmisartuata qaartartunik usisartup Bornholm sapaatit-akunnerata siuliani qulaammagu Ruslandimiut timmisartuannit nakkutigineqarpoq, kingornalu tassa imartami Ruslandip soqutigisaqarfiani sungiusartoqarluni.

Ruslandimiut Danmarkip silaannartaanut timmisartornerat Jeppe Kofodip isornartorsiorpaa, nunat tamalaat malittarisassaannik Ruslanndimiut malinninnissaat kaammattuutigalugu.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat