Danskit sakkutuui tigusarinneqataapput
Danskit sakkutuui 250-t Irakip kujasissuani unnuaq saassusseqataapput. Tuluit sakkutuui 750-it peqatigalugit Basrap avataani illoqarfeeqqat ilaat saassuppaat, sakkutuullu naalagaat pinerlussimasut sisamat tigusaralugit.
Sakkutuunik ajoqusertoqanngilaq, shiamuslimilli sakkutuui, mahdit, akiniaaniarlutik maanna sioorasaaripput.
Danskit Irakimi sakkutuuisa naalagaat, oberst Per Mikkelsen, oqaluttuarpoq, sakkutuut naalagaasa pinerlussimasut taakku tigusarinissaat pingaaruteqarsimaqisoq. Pinerlussimasut tigusarineqartut danskit sakkutuuinut siusinnerusukkut saassusseqataasarsimagunavipput. Saassussineq danskit akisussaaffigisaanni Alhartami pivoq, kisianni tuluit sakkutuui tassa aqutsisuupput, Per Mikkelsen oqaluttuarpoq, nangillunilu:
- Saassussinermi taama annertutigisumi aatsaavissuaq peqataavugut, ilami aamma sakkutuut 1.000-it ikigisassaanngivipput. Saassussinerpulli pilersaarutit malillugit pivoq, aallaasit imatorsuaq atorneqanngillat, aamma danskit sakkutuui saassussinermi sakkuaatinngivipput, tassa irakimiut inissiaataat marluk tuluit sakkutuuisa isaaffigimmatigik arlaannik susoqassappat tapersersuinissatsinnut ikiuunnissatsinnullu piareersimaannarpugut, Per Mikkelsen naggasiivoq.
