Danskit sakkutuui saassunneqarput
Afghanistanimi Irakimilu danskit sakkutuui ullup unnuallu kingulliup iluani saassunneqaqattaarput.
Danskit sakkutuui Irakimiittut ippassaq qaartartumeeriffigineqarput. Sakkutuut qullersaqarfiata nalunaaruteqarnera naapertorlugu Camp Danevangip tungaanut arfineq-marloriarluni qaartartumeerisoqarpoq.
Qaartartut tallimat tunnerminni qaarput, taamaattorli inuit atortorissaarutillu ajoquserneqanngillat.
Allamik qaartartoqarnersoq misissuisoqarnerani Camp Danevangimi sulisut tamarmik nalunaaquttap akunnera ataaseq qimaaffissiamiikkallartinneqarput.
Danskit sakkutuui Afghanistanimiittut ullut tamangajaasa saassunneqartarput. Ippassaq ualikkut sisamassaa qaartartumeerneqarsimasut nalunaarutigineqarpoq. Danskit timmisartuutaasa qaartartumeerisut akisimavaat. Danskillu sakkutuui tamarmik ajunngitsut aamma nalunaarutigineqarpoq.
Sakkutuut juulip 26-aniilli Afghanistanip kujasinnerusortaaniilermatali pingasoriarluni qaartartumeerisoqarsimasoq, sakkutuut qullersaqarfiat nalunaarpoq.
