Danskit sakkutuui Irakimit qimagutilerput

Ualip ingerlanerani danskit kingullersaata Irakimi Basrami sakkutooqarfitsik qimassavaa. Danskit kingulliit angerlararmata akisussaaffik tuluit sakkutuuinut tunniunneqarpoq.

- Ullumikkut ulloq pillugu eqqaamaneqarnissarput kissaatiginngilarput, ukiulli sisamat ingerlaneranni suliarisavut pillugit eqqaamaneqarusuppugut, taama oqarpoq Irakimi danskit sakkutuuisa naalagaaraasa ilaat, Michael Duus. Sakkutooqatini allat assigalugit sakkutuut angerlarartinneqarnissaannik naalakkersuinikkut aalajangiineq uggoraa. Angerlarartitsineq piaarpallaaqaaq, Michael Duus oqarpoq.

Irakimiunut nalinginnaasunut iliuuserisavut pillugit eqqaamaneqarusuppugut. Tassami isumagaarput taakkua meeqqatik atuariartortissinnaassagaat, 20 kilometerit pisoqqaanngikkaluarlutik nerisassanik nutaanik pissarsisinnaassasut, arnat illuminni ilaatigut uumasut inuillu anaannik karrillu kanaartaannik akuukkanik sanaajusuni erninatik napparsimavimmi ernisinnaanissaat aamma Irakimiut ataasiakkaat toqqissisimasumik inuusinnaanissaat isumagaarput, Michael Duus oqarpoq.

- Naggueqatigiit imminnut sorsuutilinnginnissaat nakkutigaarput, toqutsinerit inuiannillu nungusaanerit pinngitsoortittarpavut.

Aamma oqaatigineqarpoq Irakimiut sakkutuuisa isumannaatsuunissaq naalakkersuinermik suliaqartut kissaatigisaattut isumagisinnaanngikkaat.

Taamaattumik Irakimi naalakkersuinermik suliaqartut sakkutuullu isumaqarput danskit sakkutuuisa angerlarartinneqarnissaat ukioq ataaseq kinguartinneqartariaqaraluartoq.

- Isumaqarpunga Danmarkimi politikerit nalilersuinerminni kukkusimasut, Michael Duus oqarpoq.

Taanna aperineqarami qaqugu Danmarkimut angerlassanersoq eqqoqqissaarlugu akisinnaannginnerarpoq.

- Tamanna isertuussaavoq, tassami qaqugu angerlassanerluta angerlamut nalunaarutigigaluarutsigu peqqarniisaarniat sms-erfigineqassapput aqqusernillu sinaanni qaartartulersuilerlutik, Michael Duus oqarpoq.