Danskit rullepølsiliaat nerissallugu ulorianaateqarsinnaavoq

Maannami paasineqarpoq, puulukit neqaat Danmarkimeersut, puulukit neqaannit nunani allanit tikisinneqartartunut sanilliullugit, salmonellaqarnerujussuusut. Aviisimi BT-mi ullumikkut taama allaaserinnittoqarpoq.
Allattoq Elisa Isaksen
marsip 01-at 2009 16:58

Aviisip Danmarkimi inuussutissalerinermi qullersaqarfiup nalunaarusiaa pissarsiarisimavaa, tassanilu oqaatigineqarpoq, puulukit neqaat Danmarkimeersut 13 procentimik salmonellaqartut puulukillu neqaat nunanit allaneersut 10 procentimik salmonellaqartut. Oqartussaasut arlaleriarlutik neqit nunanit allaneersut salmonellamik ulikkaarnerarlugit oqaatigisaraluarpaat.

- Uppernanngilluinnarput, qallunaat salloqittarlugit paasissutissinneqartarsimapput, inuussutissalerinermik immikkut ilisimasalik Orla Zinck, aamma inuussutissalerinermut oqartussanut pisortaasimasoq oqarpoq. Sapaatip akunnerani uani oqaatigineqarpoq, qallunaat utoqqaanerusut sisamat Danmarkimeersumik medisterpølsitorsimanertik toqqutigisimagaat. 2008-mi qallunaat katillugit 3.700-t salmonellamik tunillanneqarnertik peqqiilliutigisimavaat.

Nunatsinni peqqinnissamut nakkutilliisoqarfimmit qanittukkut Radioaviisimut oqaatigineqarpoq, puulukit neqaat salmonellamik tunillanneqarsimasut pillugit mianersoqqussuteqalersaaratik.

Taamaattorli oqaatigalugu puulukip neqaanik nerisassiornermi eqqiluisaarnissaq pingaartorujussuusoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq