Danskit qimarngupput
Nunani kangillermiuunngitsut Libanon-imit qimarngunniarlugit ulapputigineqaleruttorput.
Libanonimiuunngitsut 1000-ilippassuit Syriamut qimarngunneqarsimapput, qimarngussuinermilu aqqutit naliginnaanngitsut atorneqarput. Frankrigip innuttaasuni Libanon-imiittut 20.000-iusut ilaat 2000-it qimarngunniarlugit, umiarsuarmik ilaasartaassuarmik attartorsimapput. Tuluit Italiamiullu sakkutuui ikiuiniarlutik sakkutuut umiarsuaannik aggertitsipput.
Ullumi aamma danskit qimarngusut 200-t Københavnimut tikiunneqarput, aamma unnugu danskit allat qimarngusut Københavnimut tikiunneqassapput.
Aqqutit allat ajornartoortitsissappata, umarsuit pajuttaatit ilaasartaatitut, danskinut qimaaniartunut, atorneqarnissaat piareersimaffigineqartoq, Danmarks Rederiforening oqarpoq.
Maanna aamma Island, kangianut qiterlermut aallartitsisinnaalluni timmisartumik Boeing 747-mik neqerooruteqarpoq. Timmisartorsuaq taamaattoq 360-inik ilaasoqarsinnaavoq, ullumilu aallaruni aqagu danskit angerlamut apuunneqarsinnaassapput.
