Assi: Simon Uldum

PITUFFIK Danskit politikeriisa ministeri Pituffik pillugu isumasioqatiginiaraat

Amerikamiut suliffeqarfiutaata Exelis Servicesip Pituffimmik kiffartuussinissamik 2014-imi isumaqatigiissusiorfigineqarnerata inatsisitigut atuuttussaatinneqarneranik USA-mi eqqartuussiviit ilaannit ilalerneqarnera Christiansborgimi partiinit arlalinnit isornartorsiorneqarpoq.

Dansk Folkepartip Kalaallit Nunaannut tunngasunut oqaaseqartartuata, Folketingillu nunanut allanut tunngasunik ataatsimiittartuini siulittaasup Søren Espersenip oqaatigaa Danmark Nunarpullu piffissaagallartillugu iliuuseqarsimanngitsut.

Eqqartuussivitsigut nutaamik aalajangiineq pissutaalluni Pituffik pillugu nutaamik suliariumannittussarsiuussisoqarnissaanut atatillugu nutaamik isumaqatigiissusiortoqarsinnaajunnaartoq Dansk Folkeparti aamma isumaqarpoq.

- Kingusinaareerpugut, Søren Espersen, Finans.dk-mut oqarpoq, nangillunilu:

- Exelis sooq taamaaliussava? Kiffartuussinissamimmi isumaqatigiissusiorfigineqarsinnaanera eqqartuussivitsigut aalajangerneqarpat ajornaquteqarnavianngilaq, Søren Espersen oqarpoq.

Aamma atuaruk Vectrus sullissilernissaminut qilanaartoq

Eqqartuussiviup aalajangernera Enhedslistenimit aamma ajuusaarutigineqarpoq:

- Ernumagalugu utaqqisimasarput piviusunngorpoq. Ministerilu maanna isumasioqatigiittariaqalissaagut, taassumallu maanna nalunaarutigisariaqassavaa maanna qanoq iliuuseqartoqarniarnersoq, Christian Juhl, Enhedslistenimeersoq oqarpoq.

Eqqartuussiviup aalajangernera nunanut allanut tunngasunut ministerimit Kristian Jensenimit suli oqaaseqarfigineqanngilaq.

Aamma atuaruk Aaja Chemnitz Larsen: Naalakkersuisut akisussaasuupput

Aamma atuaruk Qujakitsoq: Eqqartuussut tusaatissatut tiguarput

Aamma atuaruk Pituffimmi kiffartuussinissamik isumaqatigiissut danskit suliffeqarfiutaasa annaavaat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl