Danskit politikerii ataatsimoorussamik eqqaamasaarussimapput
Partiit naalakkersuisuutitaqartuusimasut, Venstre aamma De Konservative, Kalaallit Nunaanni Namminersorlutik Oqartussat Kalaallit Nunaanni piiaviliornissamik siuarsaallutik suliniuteqarnerannik tupaallatsinneqarsimallutik oqalunnerat naammaginanngitsumik patsisiliineruvoq. Politikerit partiinit taakkunaneersut ukiut 30-it sinnerlugit ministeriusarnermikkut folketingimullu ilaasortaanermikkut Kalaallit Nunaanni aatsitassanik suliffissuaqarnerup pilersinniarneqarneranut peqataalluinnarsimapput.
-Danskit aalajangiisartui nammineerlutik periusissanik maanna allamiut suliffeqarfiisa Kalaallit Nunaannik soqutiginnilerannut aallaaviusunik inerisaaqataanikuupput. Politikererpassuit, naalakkersuisuutitaqartartut, ministeriaqarfinni atorfilittat qullersaasut suliamut tassunga peqataapput, taamaammat Danmarkimi illuatungiliuttut maanna ineriartorneq tupaallaatigisimallugu oqaaseqarnerat eqqumiitsupilussuuvoq, Johan Lund Olsen oqarpoq.
Politikerip IA-meersup tunngavilersuutigisai Kim Andersenimit Venstremeersumit, piffissami 2003-mit 2009-mut aatsitassat ikummatissallu pillugit siunnersuisooqatigiinni siulittaasuusimasumit taperserneqarput. Taassuma danskit tungaannit Kalaallit Nunaanni aatsitassat siornatigut soqutigineqarsimannginneri ilumoornerarpaa.
-Ukiuni aatsitassat ikummatissallu pillugit siunnersuisooqatigiinni siulittaasuuffigisanni danskit aningaasaliisartut suliffeqarfiilu Kalaallit Nunaata pisuussutaanik soqutigisaqarpallaannginnerat arlaleriarlunga eqqumiigisarpara, Kim Andersen, atuagassiamut sapaatip akunneranut saqqummersartumut Mandag Morgenimut oqarpoq.
Kim Andersen aamma oqarpoq Siunnersuisooqatigiit sulinerat innuttaasut akornanni soqutigineqarpiarsimanngitsoq:
”Matoqqasuuvugut, akuersissutillu qassit tunniunneqarsimanersut pillugu tusagassiorfinnut nalunaaruteqaraangatta politikkikkut danskillu tusagassiorfiisa tungaannit soqutigineqarneq ajorput".
Johan Lund Olsen naapertorlugu danskit politikeriisa danskit inuussutissarsiortut Kalaallit Nunaanni aatsitassarsiornermut peqataannginnerannik tupigusuleriasaarnerat ernumaleriasaarnerallu paasiuminaatsupilussuuvoq. Sammisaq Siunnersuisooqatigiinni eqqartorneqaannarani aamma danskit-kalaallillu namminersorneq pillugu isumalioqatigiissitaanni eqqartorneqarpoq, tassanilu ilaatigut danskit folketingimut ilaasortat 2004-mit 2008-mut Kalaallit Nunaata namminersulernissaanik ilusilersueqataasimallutik. Johan Lund Olsen isumalioqatigiissitani nammineq ilaasortaasimavoq, danskillu suliffeqarfiisa allamiut ingerlatseqatigiiffiinut naligiissinneqarsimanerat tamanit ilisimaneqartoq uppernarsarsinnaavaa:
”Siunnersuisooqatigiit Namminersornerlu pillugu isumalioqatigiissitat eqqarsaatigalugit periusissatut eqqarsaataajuarsimavoq ingerlatseqatigiiffiit Kalaallit Nunaata avataaneersut aatsitassarsiornermut piianermullu akuersissuteqarnermi naligiimmik pineqassasut. Tamannalu aamma Danmarkimut atuuppoq, Johan Lund Olsen atuagassiamut sapaatip akunneranut saqqummersartumut Mandag Morgenimut oqarpoq.
Læs hele artiklen her: https://www.mm.dk/v-og-k-sagde-god-for-gr%C3%B8nlands-r%C3%A5stofeventyr#.USZRSLXMUBQ.email
