Danskit pinnersaatit pillugit inatsisaat New York Timesip saqqaani allaaserineqartoq
Danskit inatsisinik sukaterinerat aviisip New York Timesip ullumi saqqummersup saqqaani allaaserineqarpoq. Allaaserisaq ima aallaqqaasiuserneqarsimavoq:
- Danmark, allamiunut ammasuunerminik qanga tulluusimarutiginnittuusoq qimaasunut nunasiniartunullu qaammatini kingullerni allarluinnarmik oqariartuuteqartalerpoq: Maanngartigasi eqqarsarluaqqaaritsi.
Sukaterinerit Folketingimi ippassaq pingasunngornermi suliarineqartut pissutigalugit qimaasut Danmarkimut tikittut pigisanik 10.000 koruunit sinnerlugit nalilinnik Danmarkimut nassataqaqqusaajunnaassapput. Taamaattoq pinnersaatit eriagisatut nalillit, soorlu katittut assammiui matumani pineqanngillat. Pigisalli allat 10.000 koruunit sinnerlugit nalillit arsaarinnissutigineqartalissapput, tamannalu malinneqanngippat qimaasut Danmarkimut qimaasutut iseqqusaassanngillat.
The New York Times isornartorsiuisunut innersuussivoq, taakku inatsisissatut siunnersuut Tysklandimi nazistit sorsunnersuup aappaata nalaani juutit kigutaasa ilaarnerinik kuultiusunik arsaarinnissuteqartarsimanerannut assersuuppaat isumaqarlutillu inatsit 'Europami pisut tujorminarnersaata nalaanut' kingumut eqqarsalersitsisoq.
Inatsisissatut siunnersuut Folketingimi amerlanerussuteqartunit tapersersorneqarpoq januaarillu 26-ani akuersissutigineqartussatut naatsorsuutigineqarluni.