Danskit piareersaqquaat
Sapaatit akunnialunngui qaanguippata danskit sakkutuui Afghanistanip kujasissuanut aallartinneqassapput. Danskilli innuttaasuisa nunaqqatiminnik annaasaqarsinnaanerminnut piareersimanngitsut, Dansk Folkepartiimeersoq Søren Espersen oqarpoq. Taanna isumaqarpoq danskit naalakkersuisuisa innuttaasut piareersartariaqaraat, ilaatigut oqariartuutigalugu, Afghanistani nunaammat sakkutuujuffigissallugu ulorianartoq.
- Sakkutuutut toqutaasinnaaneq USA-mi innuttaasunit piareersimaffigineqartarpoq, qularaaralu danskit innuttaasuisa tamanna piareersimaffigigaat. Afghanistanimi sakkutuutut sulinissami toqutaasinnaaneq aamma pisinnaasoq Danmarkimi innuttaasunut oqaluttuarineqartariaqarpoq, innuttaasullu piareersarneqartariaqarput, Søren Espersen, Dansk Folkepartiimeersoq oqarpoq.
Inuusuttut 18-it 29-illu akornanni ukiullit isumasiorneqarnerini amerlaqisut isumaqarput, danskit sakkutuuinik Afghanistanimut nassiussinissaq, Danmarkip isumannaatsumik nunagisinnaaneranut ajoqutaassasoq. Utoqqaanerulaartut isumaqarput Danskit sakkutuui sorsuffinniitinneqartarneri ajunngitsoq. Inuusuttulli sorsuffinnut nassiunneqarnerusartut ernumanerupput, akerliunerullutillu.
