Dansk Folkeparti isumaqataavoq. USA nunalluunniit pissaanilissuit allat nunatsinnut aningaasaliiniassagaluarpata naalagaaffeqatigiinnermi avissaartuuttoqarneranik kinguneqaratarsinnaanera, Dansk Folkepartip siulittaasuata Søren Espersenip aarleqqutigaa.Assi: Martin Sylvest/Ritzau Scanpix

Danskit partiivi arlallit nunat pissaanilissuit nunatsinnut neqeroornissaat aarleqqutigigaat

Nunatta Kinamit Ruslandimillu aningaasaliiffigineqarnissamik akuersinissaa, Venstrep Dansk Folkepartiillu ernummatigaat.

Naalakkersuisut - danskit naalakkersuisuinit taperserneqarlutik - USA-p 82 millionit koruuninik aningaasaliiniarneranik apriilimi qujarussinerat, danskit politikeriisa ilarpaaluisa uitsatigaat.

Nunatsinni ilaatigut aatsitassarsiornermut takornariartitsinermullu tunngasutigut siunnersuisoqartassaaq. Tamannali Folketingimi partiit ingammik talerperliit qinnguluutigaat.

AAMMA ATUARUK Tusarfiit KNR-imut: USA nunatsinnut 82 millionit koruuninik tapiissuteqarniartoq

Venstre nunatta USA-p aningaasaliiniarneranik akuersineranut tapersiivoq. Partiilli talerperliusut nunat pissaanilissuit allat nunatsinnut neqeroornissaat ernummatigaat.

USA-p 83 millionit koruuninik nunatsinnut aningaasaliiniarnera

- USA 12,1 millionit dollarinik - tassa 83 millionit koruuninik - nunatsinnut aningaasaliiniarnera apriilip ulluisa 23-anni pisortatigoortumik nalunaarutigineqarpoq. 

- Aningaasaliissutissai 2020-mi 2021-milu atorneqassapput.

- Aningaasat taakku amerikamiut immikkut ilisimasallit siunnersuisullu nunatsinni aatsitassarsiornermut, takornariartitsinermut inuussutissarsiutinullu allanut tunngatillugu siunnersuinerannut atorneqassapput. 

- Nunatta inuusuttai Amerikami ilinniarnissamik periarfissaqartitaassasut, isumaqatigiissummi aamma allassimavoq.

Tusarfik: Naalakkersuisut

- Kina sapaatit akunnerata tulliani neqeroorluni saaffiginnissagaluarpat qanoq iliortoqassava? Naalakkersuisuvut taava oqaqqiinnassappat, Kalaallit Nunaata tamanna akisussaaffigigaa: Kalaallit Nunaata tamanna nammineq aalajangissavaa, tamannalu qularnanngitsumik ajorisassaanavianngilaq. Ruslandimi tamatuma kingorna taamaaliorpat? Venstrep nunanut allanut tunngasunut oqaaseqartartua, Michael Aarstrup Jensen, USA-p neqoornera pillugu Folketingimi sisamanngornermi oqallinnermi aperaaq. 

Taanna isumaqarpoq, nunatta USA-p aningaasaliiniarneranut akuersinnginnerani Folketingimi nunanut allanut tunngasunut politikkikkut aalajangiisartoqatigiit ilisimatinneqarsimasariaqaraluartut. 

AAMMA ATUARUK Trump Dronningimut: Sinniisoqalernikkut Kalaallit Nunaannut attaveqarnerulissaagut

USA-p aningaasaliissutiginiagai 82 millionit koruuniusut Kalaallit Nunaata akisussaaffiinut atorneqartussaagaluartut, nunanut allanut tunngasunut isumannaallisaanermullu politikkinut aamma attuumassuteqartut, Michael Aarstrup Jensen isumaqarpoq.

Dansk Folkeparti isumaqataavoq. USA nunalluunniit pissaanilissuit allat nunatsinnut aningaasaliiniassagaluarpata naalagaaffeqatigiinnermi avissaartuuttoqarneranik kinguneqaratarsinnaanera, Dansk Folkepartip siulittaasuata Søren Espersenip aarleqqutigaa.

- Taamaammat tamatta ingerlaqqissagutta, Kalaallit Nunaata naalakkersuisui suleqatissaminnik toqqaanissaat pissusissamisuussagaluarpoq: Kalaallit Nunaata Danmarki USA-luunniit suleqatiginiarpaa?

- Kalaallit Nunaanni politikerit tamanna aalajangissavaat, Søren Espersen oqallinnermi oqarpoq.

Nunanut allanut tunngasunut ministeri qulaqqusinngitsoq

Kina Ruslandiluunniit nunatsinnut aningaasaliiniarlutik neqerooraluarpata danskit naalakkersuisui qanoq iliorniarnersut apeqqutigineqarmat, danskit nunanut allanut ministeriat Jeppe Kofod (S) oqallinnermi toqqaannartumik akissuteqanngilaq.

Taassumali nunatta namminersornermut inatsit tunngavigalugu akisussaaffeqarfini pillugit isumaqatigiissuteqarsinnaatitaanera taperserpaa.

- USA-p naalagaaffeqatigiinnermut sakkannera tamatumanilu avissaartuutsitsinera siooranartuusorineqarpoq. Siooranartuusorinngilarali. Kalaallit Nunaata namminersornermut inatsit tunngavigalugu akisussaaffeqarfini pillugit suliniuteqarnikkut USA-mik suleqateqarnera pissusissamisuuginnarpoq, Jeppe Kofod oqarpoq.

AAMMA ATUARUK Danskit ministeriat: USA Pituffik pillugu isumaqatigiissut suliariumannittussarsiuukkusuppaa

Partiit danskit naalakkersuisuinut ikorfartortaasut arlallit, tamatumani Enhedslisten aamma Inuit Ataqatigiit, nunanut allanut tunngasunut isumannaallisaanermullu politikkit Kalaallit Nunaata Savalimmiullu akisussaaffeqarfiinut qaqugu atuutilersinneqassanersut erseqqissumik oqaatigineqartariaqarsoraat.

Folketingimi ilaasortat tamarmik, aamma nunanit avannarlerneersut, Folketingimi sisamanngornermi oqallinnertik aalajangernermik oqaasertaliillutik naggaserpaat. Allagaat ilaatigut ima imaqarpoq:

- Folketingimi nunanut allanut tunngasunut politikkikkut aalajangiisartoqatigiit, nunanik allanik nunanut allanut tunngasunut, illersornissamut isumannaallisaanermullu politikkinut tunngasunik isumaqatigiissuteqannginnermi, ilisimatinneqartarnissaat pisariaqartoq, Folketingi isumaqarpoq.  

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat