Danskit nunatsinniittut qinersigaangamik Demokraatit qinerusunnerusarpaat

Sermitsiaq qinersisartunik isumasiuititsigami, paasinarsivoq Kalaallit Nunaata avataaneersut 64 procentiisa Demokraatit qinerniaraat.

Tamanna Inuit Ataqatigiit siulittaasuata Josef Motzfeldtip ernummatigaa, iluarinngilaami inuiannik immikkoortiterisoqalissappat.

-Ammit qalipaat najoqqutaralugu inuiaqatigiit massakkut avinneqalersutut isikkoqarnerat, politikkikkut isummat najoqqutarinagit, partiit siulittaasuattut assut annilaarutigivara, Josef Motzfeldt oqarpoq.

Josef Motzfeldtilu isumaqarpoq, taamatut pisoqarnera peqquteqarsinnaasoq inuiattut namminiileriartornerput avataaniit tikittunit qisuariarfigineqalermat.

-Kalaallit nammineerusulernermik oqariartuuteqarnerat nikkassaanertullusooq tassani soorlu oqaatigineqartoq,

Josef Motzfeldt oqarpoq.

Isumasiuititsinerup aamma takutippaa Inuit Ataqatigiit, Siumut Demokraatillu partiitut angeqqatigiilersimasut. Demokraatit siulittaasuata Per Berthelsen-ip isumasiuititsinerup takutitai tupinnanngitsumik nuannaarutigai.

-Tupinnanngitsumik qallunaat qallunaatullu oqaaseqartut ukiorpassuarni politikkimut qanimut attuumassuteqarlutik ineriartornikuupput, taamaattumillu piviusorsiortumik isiginneriaaseq taanna qularnanngitsumik salliuffigivaat siuarsimaffiginerullugulu. Taamaattumik nunatsinni piviusorsiortumik politikkimik naalaartunik siulliullutik allanngujaatsumik inissikkiartortuupput, Per Berthelsen oqarpoq.