Danskit nunatsinneersunik nutaalluinnartunik aalisagassaqartinneqalerput
Atuisartut nerisassanik pitsaanerpaaginnarnik piumasaqarneruleriartorput. Nerisassat akisugaluarlutik kajungernarsaakkat piumaneqarneruleriartorput, tamannalu nunatsinni Danmarkimilu inuussutissanik suliaqartut arajutsisimanngikkaat, aviisi Børsen aallaserinnippoq.
Royal Greenlandi aalisakkanik nutaalluinnartunik ”69 Grader Nord”-inillu atsikkanik Danmarkimi tuniniagaqalerpoq. ”69 Grader Nord”-mik atsiinerup tunngavigaa, Ilulissat aalisagaqarluartut qaleraleqarluartullu allorniusat avannamukartut 69-ianniinnerat.
Aalisakkat tunineqarniariartut timmisartumik Danmarkiliaanneqartarput, tamannalu ajornaatsuinnaanngitsoq Børsen allappoq.
Aalisakkat timmisartumut inortuippata, danskit ulloq taanna nutaalluinnartunik aalisagassaqanngillat, taamaattumillu aalisartut timmisartoqarnissaa naapertukannerlugu tunisaqartarnerat tunisassiornermi pingaaruteqarluinnartoq, Royal Greenlandimi tunisassiornermut aqutsisoq Mikael Christensen oqarpoq.
