Danskit nunanut allanut tunngasunut ministeriata Issittumi pissanganartorsiorneq EU ikiortigalugu pinngitsoorniarpaa
Issittoq soqutigineqarleraluttuinnarpoq aningaasarsiortoqarnerulerlunilu. Pinngortitap sunnerneqarnerusalernera sikullu aakkiartornera pissutigalugit avataanit soqutiginninneq annertusiartortoq, allanut tunngasunut ministeri oqarpoq.
Soqutiginnittut amerliartortillugit pissanganartorsiornerit pinngitsoortinneqartariaqarput
EU-lu pingaaruteqarluinnartumik inissisimasoq, ministeri isumaqarpoq.
- Pingaartumik Issittup pissanganartorsiorfiunnginnera attatiinnassagaanni EU aamma EU-mi nunat ilaasortaasut qanoq tapersiisinnaanerat pillugu Issittumilu unammilligassat nutaat qanoq passunneqarsinnaanerat tassani pineqarpoq.
AAMMA ATUARUK Russit sakkussiornerat, aatsitassat aamma Issittumi umiarsualiviit nutaat, USA-p soqutiginninneranut tunngaviupput
- Kunngeqarfiup Danmarkip issittup imartaani naalagaaffittut Europap sinneranit sammineqarnini nuannaarutigaa, Jeppe Kofod Finlandip illoqarfiisa pingaarnersaanni Helsinkimi EU-mi nunanut allanut tunngasut pillugit ministerit pingaartorsiutaanngitsumik ataatsimiinerisa kingornatigut oqarpoq.
Issittoq pingaarnerpaatut oqallisaavoq
Helsinkimi ataatsimiinnermi Issittoq oqaluuserisat pingarnersaraat. Kisianni Amerikap præsidentiata Donald Trumpip Kalaallit Nunaata pisiariumaneranik oqarnera peqqutaanngilaq, Jeppe Kofod erseqqissaavoq.
Finlandi EU-mi maanna siulittaasuuvoq Issittorlu pillugu oqaluuserisassaq saqqummiullugu.
EU-p nunallu EU-meersut Issittumi qanoq tapersersuissanersut annerusumik oqaluuserineqarpoq.
AAMMA ATUARUK USA-p nunanut allanut tunngasunut ministeriata Issittoq pillugu suleqatigiinnerunissaq kissaatigigaa
- EU arlalitsigut ikiuussinnaavoq. Issittumi siunnersuisoqatigiinnut tapersersuinissaq siullertut qulakkiissallugu, aappassaattut pissangartorsiorfiunnginneq kinguneqartumillu naammassinninnissaq pingaarnerutillugit.
- Issittumi unammilligassat ataqqeqatigiilluni aaqqinneqarnissaat pingaartuuvoq, Jeppe Kofod oqarpoq.
Helsinkimi nunanut allanut tunngasunut ministerit ullut marluk ataatsimeereerlutik tallimanngornermi naggataarput.