Danskit nunani allaniitillutik immikkoorniarajupput
Danmarkimut nunasinerit ataatsimoorajupput ulluinnarnilu ilagiinnerususarlutik, taamaalillutik Danmarkimi inuiaqatigiinnut akuliuppiartaratik. Oqaatsit taakku Danmarkimi utikulunneqartarput, danskilli namminneq pitsaanerunngivissut tuluup inooriaatsinik ilisimatusaatigalugu misissuisimasup paasivaa. Assersuutigaa qallunaarpassuit Spaniamut, silaannaata kiannerunera pillugu nunasisut, nunap immikkooortuani Spaniamiunik eqqaamioqanngivillutik ulluinnarni inuusut.
Angut Jyske Bankip Spaniami Gibraltarimi immikkoortortaani ukiuni sisamassaa ilaquttanilu najugaqarsimalersut, ulluinnarni danskeqatitik kisiinnangajaasa attavigisarpaat. Spaniut oqaasii ilikkanngivissorsimavaat, tuluit oqaasii atornerugamikkit. Aamma oqarpoq Spaniamiuunngitsunik ikinngutitaartarlutik, danskeqatiminnik imaluunniit nunanit allaneersunik tuluttut oqaasilinnik.
Taama qallunaat inuusarnerat takornartaanngitsoq, tuluk misissuisimasoq oqarpoq.
- Skandinaviamiut taama inooriaaseqarput.
- Ippigisassaanngilaq, ikioqatigiinneq attaveqaqateqartuarsinnaanerlu taamaaliornermikkut angusarpaat, danskit nunanut allanut nunasinerit peqatigiiffiannit danishworldwide-imeersoq oqarpoq.
