Danskit naalakkersuisuisa meeqqat mikisut inatsisitigut suiaassutsimik allannguisinnaatinniaraat
Inatsisitigut suiaassutsimik allannguisinnaatitaanerup ukiutigut ammut killinga danskit naalakkersuisuinit maanna allanngortinniarneqalersaarpoq.
Arnaqatiminnik anguteqatiminnilluunniit atoqateqartarneq pillugu danskit naalakkersuisuisa pilersaarusiaanni ataasinngormat saqqummiunneqartumi taama allassimasoqartoq, aviisi Jyllands-Posten allaaserinnippoq.
Aviisillu taassuma allaaserisaa naapertorlugu, tamanna ilaatigut isumaqarpoq, tamatumunnga tunngatillugu Europami inatsisiliortarnerni tamani aatsaat taamak annertutigisumik taamatut siunnersuuteqartoqartoq.
Ullumikkut suiaassutsimik allannguiniartoqartillugu inatsisitigut maleruagassaq imaappoq; inuup suiaassutsini cpr-normu aqqutigalugu allanngortippagu taava tamanna atuussinnaalertarluni. Siunnersuummilu maanna anguniarneqarpoq meeqqap suli ukioqalinnginneraniit inatsisitigut suiaassutsimik allannguisinnaaneq pisinnaasariaqartoq.
Taamatuttaaq danskit naalakkersuisuisa ilanngullugu siunnersuutigaat, meeraq 15-t ataallugit ukioqarpat angajoqqaajusut akuersitinneqaqqaartassasut.
De Konservativelli siunnersuummut isumaqataanngilluinnartut, naligiissitaanermut ataatsimiititaliami oqaaseqartartuusoq, Birgitte Bergmann Jyllands-Postenimut erseqqissaavoq.
Taannami isumaqarpoq, meeqqat meeraanissaminnik pisinnaatitaaffeqaqqaartussaasut, suliluunniit namminneq qaqugu innarnissaminnik aalajangiisinnaassuseqaratik suiaassutsimik allannguinermut tunngatillugu allannguinissaminnut apeqqummut suli nukangavallaartut, taanna oqarpoq.
Danskit naalakkersuisuisa pilersaarutaat naapertorlugu oktobarimi siunnersuut saqqummiunneqassaaq.