Illersornissamut ministerip oqarnera naapertorlugu Illersornissaqarfiup issittumi timmisartuisa amerlanerpaartai Kangerlussuarmi mittarfimmik atuisooreermata Sakkutooqarfiup timmisartuisa amerlanerpaartaasa Kangerlussuarmik atuisuuginnarnissaat pisariaqartuarsinnarpoq.Assi: Simon Uldum

Illersornissamut ministeri: Danskit naalakkersuisuisa Kangerlussuaq ammatiinnarusuppaat

Danskit naalakkersuisuisa ilimagaat, Namminersorlutik Oqartussallu Kangerlussuarmi mittarfiup siunissaa pillugu tunngaviusumik isumaqatigiissusiornissartik ukiap ingerlanerani piumaartoq.

Kangerlussuarmi mittarfik siunissami pisariaqartinneqartuarsinnassaaq. Illersornissamut ministeri Trine Bramsen (S) Folketingimi ullumi sisamanngornermi isumasioqatigiillatsiarnermi taama nalunaaruteqarpoq.

- Ataatsimut oqaatigalugu Kangerlussuup matunissaa tunngaviusumik pilersaarutiginngilarput. Tamanna erseqqissumik oqaatigisinnaavara, Trine Bramsen oqarpoq.

AAMMA ATUARUK Ministeri Kangerlussuup siunissaa pillugu akissuteqassaaq

Illersornissamut ministerip oqarnera naapertorlugu Illersornissaqarfiup issittumi timmisartuisa amerlanerpaartai Kangerlussuarmi mittarfimmik atuisooreermata Sakkutooqarfiup timmisartuisa amerlanerpaartaasa Kangerlussuarmik atuisuuginnarnissaat pisariaqartuarsinnarpoq.

Kangerlussuup mittarfissuaqarfiusup akuttusuumik anorlertarnera silagikkajuttarneralu Issittumi Sakkutooqarfimmeersut siunissami annaassiniartarnissaannut illersornissamullu tunngasutigut suliarisartagassaannut pingaaruteqarluinnarpoq.

- Kangerlussuaq annaassiniarnissanut upalungaarsimalluartarnissatta qulakkeernissaanut sakkutooqarnikkullu ataqatigiissaarinerit Issittumi illersuinermut tunngaviusut eqqarsaatigalugit pingaaruteqarluinnartuusoq ersarippoq, Trine Bramsen oqarpoq.

Tamakku danskit naalakkersuisuisa nunaqarfiup Kangerlussuup 500-ngajannik maanna innuttaasoqartup matunissaanut pilersaartoqarneranut akerliugallarnerannut tunngaviupput. Kangerlussuarmi innuttaasut amerlanerpaartai mittarfimmi sulisuullutilluunniit mittarfimmi aallussaanut attuumassuteqarluinnartunik suliaqarfiusartunik atorfeqarput.

Ministeri: Naalakkersuisut kissaataat utaqqimaarpavut

Taamaalilluni Løkkep naalakkersuisuutitarisimasaasa Kangerlussuup ammatiinnarneqarnissaanut pilersaarutaat upernaaq saqqummiunneqartut danskit naalakkersuisunngorlaavinit piviusunngortinneqarput.

Tamanna suleqatigiissitap Namminersorlutik Oqartussaneersunik Danmarkillu Illersornissamut Ministereqarfianeersunik sinniisuutitaqartup Kangerlussuup siunissaa pillugu oqallisileruttortut nalunaarutigineqarpoq.

Suleqatigiissitaq upernaarli pilersinneqaraluartoq Kangerlussuarmi siullerpaamik aatsaat aggustip ataatsimiissimasoq Trine Bramsenimit ilisimatitisssutigineqarpoq.

Ministerilli ilimagaa, Illersornissamut Ministereqarfik Naalakkersuisullu Kangerlussuup siunissaa pillugu ukiaru tunngaviusumik isumaqatigiissusiorsinnaajumaartut.

AAMMA ATUARUK NATO-p Kangerlussuami mittarfik atorluartarpaa

Naalakkersuisulli Kangerlussuup siunissaanut tunngatillugu kissaatiminnik nalunaaruteqarnissaat pisariaqarpoq - matumani mittarfiup innuttaasunit qanoq atorneqarsinnaatigineranut aamma tunngasutigut.

- Nunatta Kangerlussuup siunissaanut qanoq eqqarsaateqarnera erseqqissassallugu pingaaruteqarpoq. Ilisimatitsissutigineqareersutut Kangerlussuarmi mittarfik nunatsinni illoqarfiit annersaata aappaanut tassa Sisimiunut pingaaruteqangaatsiarpoq, innuttaasullu Kangerlussuarmut isersinnaaginnarnissaasa kissaatigineqarnera danskit naalakkersuisuinit akuersaarneqarpoq, Trine Bramsen isumasioqatigiinnermi oqarpoq.

Politikerit isumasioqatigiinnermi oqaaseqarpianngitsut

Amerikamiut naalakkersuisui sakkutooqarfiup innuttaasullu iluaqutigisinnaappassuk nunatta ataqatigiinnermut attaveqarfiinut - qularnanngitsumik mittarfiinut - aningaasaleerusuttut USA-mit 2018-imi ukiakkut nalunaarutigineqarpoq.

Apeqqulli Kangerlussuarmi mittarfiup nunaqarfiullumi siunissami ingerlanneqarnissaasa kikkunnit aningaasalersorneqarnissaannut qanorlu akeqarnissaannut tunngasoq illersornissamut ministerimit Trine Bransenimit annerusumik akineqarsinnaasimanngilaq.

Taamaattorli Issittumi Sakkutooqarfiup Kangerlussuarmik atuisuuginnaarnissaa Danmarkimit kissaatigineqartoq USA-mut Illersornissamut Ministereqarfimmit nalunaarutigineqarpoq.

AAMMA ATUARUK Amerikamiut Kangerlussuarmut missinnaanissaq pisariaqartippaat

Kalaallit Nunaanni mittarfiit ukiuni kingullerni annertuumik oqallisigineqartarnerat eqqarsaatigalugu politikerit isumasioqatigiinnermi apeqqarippallaannginnerat ippinnarpoq.

Isumasioqatigiinneq 17 minutsiinnarnik sivisussuseqarpoq, isumasioqatigiittoqarneranullu aallarniisoq Aaja Chemnitz Larsen Inuit Ataqatigiinneersuusoq Illersornissamut Ministereqarfik saqqummeereermat kisiartaalluni oqaaseqaateqartuullunilu apeqquteqartuuvoq.

- Tusaasakka aallaavigalugit Kangerlussuup matunissaa danskit naalakkersuisuinit kissaatigineqanngitsoq paasivara. Isumaqarpunga taama neriorsuisoqarnera soqutiginartoq, Aaja Chemnitz Larsen oqarpoq.

Isumasioqatigiinneq uani isiginnaarsinnaavat isiginnaaqqissinnaalluguluunniit.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat