Kalaallit Nunaanni pinerluttunik isumaginnittoqarfiup oqarnera naapertorlugu sulisunut inissinneqarsimasunullu isumaatsuutitsisussat nakkutilliisut 49-sussat 33-nnaapput.Assi: KNR

Danskit naalakkersuisuisa inissiisarfinni sulisussaaleqineq aaqqiissuteqarfiginiarsariniaraa

Danskit naalakkersuisui aningaasanik amerlanerusunik neriorsuinatik Nuummi pinerluuteqarsimasunut inissiisarfimmi nutaami sulisussaaleqinermut aaqqiissuteqarniarput.

Pinerluuteqarsimasunik inissiisarfinni parnaarussivinnilu danskit kalaallillu sulisut akissarsiaasa assigiinnginnerat Nuummi pinerluuteqarsimasunut inissiisarfittaami sulisussaaleqinermut pissutaasut ilaattut oqaatigineqarpoq.

Danskit naalakkersuisuisa tamanna misissuiffigissallugu piareersimaffigigaat, Socialdemokraatit aningaasaqarnermut oqaaseqartartuata, Christian Rabjerg Madsenip oqaatigaa.

- Danskit parnaarussiviini atorfillit kalaallillu pinerluuteqarsimasunut inissiisarfiini atorfillit akornanni akissarsiatigut assigiinngittoqarnerani ajornartorsiuteqartoq nassuerutigaarput.

AAMMA ATUARUK Akissarsiat assiginnginnerat pillugu ministereqarfik suli akinngilaq

- Ajornartorsiutaasoq tamanna aaqqiissuteqaqataaffigisinnaanerlutigu misissorusupparput, kalaallit Folketingimi ilaasortat partiillu allat aningaasaqarnermut inatsimmik maanna suliaqaleruttortut tamanna pillugu oqallisigeqatigereerpagut, Christian Rabjerg Madsen oqarpoq.

Partiit saamerliit akissarsiat qaffasinnerunissaanut tapersiiniartut

Politikenip Nuummi pinerluuteqarsimasunut inissiisarfimmi sulisussaaleqinermik ajornartorsiuteqarnermut atatillugu allaaserisaa naapertorlugu Folketingimut ilaasortap Inuit Ataqatigiinneersup, Aaja Chemnitz Larsenip 8 millionit koruunit aningaasanut inatsisissamit nassaarineqarnissaat siunnersuutigaa.

Tamanna Kalaallit Nunaanni nakkutilliisut Danmarkimi akissarsianut naleqquttumik akissarsiaqalernissaannut qulakkeerutaassaaq, taamaalilluni sulisussanut pilerinarnerulissalluni. Siunnersuullu taanna partiimit ikorfartortaasumit SF-imit taperserneqarpoq.

- Inatsisitigut piumasaqaataavoq, tamannalu SF-imit taperserparput, SF-ip inatsiseqarnermut oqaaseqartartua, Karina Lorentzen Dehnhardt oqarpoq.

Naak Socialdemokraatit aningaasaqarnermut oqaaseqartartuata ajornartorsiutip misissuiffiginissaa aningaasanullu inatsisissap isumaqatigiinniutigineqarnissaanut oqallisiginissaa piareersimaffigigaluarlugu susassaqarfimmut tunngatillugu isumaqatigiinniarit upernaamut isumaqatigiinniutigineqartussaammata suliap naammassiuminaassinnaanera takusinnaavaa.

- Tamanna aaqqiissuteqarniarnermut atatillugu naammassiuminaatsitsisinnaassasoq qularnanngilaq, Christian Rabjerg Madsen oqarpoq.

Nakkutilliisunit 33-nit 21-t ilinniartuusut

Nuummi pinerluuteqarsimasunut inissiisarfiup juunimi ammarneraniillu sulisussaaleqingaatsiartoqalersoq politikenip allaaseriaa.

Kalaallit Nunaanni pinerluttunik isumaginnittoqarfiup oqarnera naapertorlugu sulisunut inissinneqarsimasunullu isumaatsuutitsisussat nakkutilliisut 49-sussat 33-nnaapput.

AAMMA ATUARUK Parnaarussiviit Kattuffiat ministerimit suli akissutissarsinngitsoq

Nakkutilliisunit 33-nit 21-t ilinniarnerminnut atatillugu suliffimmi misiliisuupput. Taakkulu tassaagajunnerullutit angutit arnallu 20-t akornanni ukioqartut ilinniarsimanngitsut.

Inatsiseqarnermut ministereqarfiup Danmarkimi parnaarussivinni nakkutilliisuusimasut aqqaneq-marluk misilittagallillu isumannaatsuutitsinissaq qulakkeerniarlugu oktobarip naalernerani nunatsinnukartippai. Taakku decembarimit nunatsinniikkunnaaqqissapput.

Inatsiseqarnermut ministerip, Nick Hækkerupip (S) suliamut atatillugu oqaaseqartinniarnera iluatsissimanngilaq.

/ritzau/

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat