Danskit naalakkersuisuisa Erfalasorput alapernaarsuisut Siriusikkut qamutaannut ilanngunniaraat
Alapernaarsuisut Siriusikkut nunatsinni nakkutilliigaangata danskit erfalasuat qamutaaniittarpoq.
Danskilli erfalasuata saniani Erfalasorput ilanngunneqassasoq danskit naalakkersuisuisa kissaatigaat. DR taama allappoq.
Illersornissamut ministeri Trine Bramsen naapertorlugu, tamanna takussutissatut immikkut naleqarpoq.
- Isumannaassuseq toqqissisimanerlu pillugit kalaallinik suleqateqarnitta erseqqissumik takutinnissaa uani pineqarnerpaajuvoq. Suleqatigiippugut ataatsimoorussamillu akisussaassuseqarluta, Bramsen DR-imut oqarpoq.
K DF-ilu isumaqataanngitsut
Danskit erfalasuat kisimi 1952-imili qamutiniittarpoq.
Danskillu naalakkersuisuisa erfalasut marluk qamutiniittalernissaannik kissaateqarnerat Folketingimi partinit tamanit isumaqatigineqanngilaq.
De Konservatekkut nunarput pillugu oqaaseqartartuata, Ramus Jarlovip, Erfalasorput naalagaaffeqatigiit illersornissaannut attuumassuteqanngissoraa.
Taannalu Dansk Folkepartip nunarput pillugu oqaaseqartartuanit Søren Espersenimit isumaqatigineqarpoq. Nunarput sakkutuut pillugit pisussaassuseqanngitsoq Espersen DR-imut oqarpoq.