Danskit naalakkersuisui neriorsueqqiinnarnerarneqartut
Danskit naalakkersuisuisa isummat pisoqqat nutaatut isikkoqalersippaat, nunanut siuarsarniakkanut silap allanngoriartorneranut tunngatillugu aningaasaliussat pillugit neriorsuutimik ukiunik marlunnik pisoqaassusillit uteqqinnerisigut.
Ukiuni pingasuni tulliuttuni checki 1,2 mia. koruuninik nalilik aqqutigalugu danskit naalakkersuisui isumaqarput, Danmark nunanut siuarsarniakkanut silap allanngoriartorneranut tunngatillugu nutaanik aningaasaliinermigut siuartuusoq.
Tamannali pinngortitaq inuillu pisinnaatitaaffii pillugit suliniaqatigiiffinnit arlaqartunit isumaqatigineqanngilluinnarpoq.
Silap allanngoriartorneranut tunngatillugu aningaasat immikkoortitat, naalakkersuisunit nunanut siuarsarniakkanut sila pillugu neriorsuutitut nutaatut tuniniarneqartut, ukiut marluk matuma siornagulli pilersinneqareersimapput taamalu naalakkersuinermi tunngavigineqarlutik. Silap allanngoriartorneranut tunngatillugu aningaasat immikkoortitat ukiup tulliani 100 mio. koruuninut qaffappata taava nunanut siuarsarniakkanut suliniutit allat aammattaaq 100 mio. koruuninik ikilissapput.
- Naalakkersuisut iluatsitsineq pillugu piaartumik qulequtassarsiunnguatsiarput. Pissusiviatigulli isumaqarpunga sapiiserneruallaartoq Danmark nunatut qaaqqusisutut kisitsisitigut taamaaliorluni sianiinaariniartoq, Mellemfolkeligt Samvirkemi siulittaasoq, Trine Pertou Mach, taama oqarpoq.
