Danskit naalakkersuisui manngertitarput

Nunani allani tigusanik europamullu isertortumik parnaarussiviliaatassanik, CIA timmisartukkut nunarput aqqusaarlugu angallassisarsimanersoq Danskit nunanut allanut ministeriata Per Stig Møllerip misissuivigeqqunngilaa.

Tamanna Folketingimi ilaasortap Kuupik Kleistip pissusissamisoorsorinngilaa.

- Eqqumiippoq paasissutissat saqqummereersut danskit naalakkersuisui manngertitaaginnarmata, periarfissikkaluarpavut; ilumut unioqqutitsisoqarsimanngippat eqqunngitsumillu pisoqarsimanngippat misissuisitsinermikkut tamanna uppernarsassallugu. Taavalu apeqquteqaqattaarnerput pisimasumillu malersuineq taamaalilluni unitsinneqarsinnaagaluarpoq.

Kuupik Kleist oqarpoq uppernarsereernikuugitsik, CIA timmisartuussisarsimasoq nunarpullu nunniffiusarsimasoq. Qanoq kinguneqarsinnaanera toqqaannartumik oqaatigisinnaanngikkaluarlugu ilumut unioqqutitsisoqarsimappat taava uppernarsarneqartariaqassasoq Danmarkimi naalakkersuisut eqqunngitsumik paasissutissiisimasut Kuupik Kleist oqarpoq.