Danskit naalakkersuisui allanngortiteriffigineqassapput
Bødskovip Folketingimi ataatsimiititaliat ilaannut piaaraluni eqqunngitsumik paasissutissiisimanini pissutigalugu tunuarpoq, Søvndahlilu napparsimanini pissutigalugu tunuarluni. Villy Søvndal nulianilu piffissami kingulermi marluullutik uummatiminnik ajornartorsiorteqarsimapput, tamannalu pissutigalugu Søvndahl nunanut allanut ministeritut tunuartoq oqaatigineqarpoq.
Isumaginninnermut ministeri Anette Vilhelmsen ministeriunini annaanniarlugu maannakkorpiaq aamma ilungersuuteqarpoq. Taanna aningaasanik puljemit suliluunniit pilersinneqarsimanngitsumit Huset Zoringimut 1 mio. koruuninik tapiissuteqarnissamik neriorsuuteqarsimanini pillugu ajornartorsiorpoq. Zoring aamma qinnuteqaasiornermini ministeriaqarfiup atorfilittaanit ikiorneqarsimavoq. Piffissaagallartilluguli iliuuseqarsimannginnini pissutigalugu naveersiinnarnissaa naatsorsuutigineqarpoq.
Uffe Elbæk aamma Christian Friis Bach ministeriaqarfimmi pikkorliorsimanertik pissutigalugu aamma ministeritut tunuartariaqarsimapput. Aammattaaq nukissiornermut ministeri Martin Lidegaard Folketingimut paasissutissanik eqqunngitsunik saqqummiussaqarsimanini pissutigalugu Folketingimit sakkortuumik mianersoqquneqarsimavoq.
Helle Helle Thorning ministerinik nutaanik toqqaasussanngoruni politikerit ingerlatsillaqqissut aammalu tatiginarluinnartut toqqartariaqassavai, Thorningimmi naalakersuutitai mamiatsannartuliornernik mikinerusunik anginerusunillu aqqusaagaqaqqissinnaanngilaq.
Villy Søvndahl parteeqatiminit Holger K. Nielsenimit nunanut allanut ministeritut taarserneqarnissaa ilimanartupilussuuvoq. Taamaasilluni Pia Olsen Dyhr akileraartarnermut ministeriaqarfimmi inissaqartinneqarlissaaq. Taamatullu allannguisoqarneratigut assartuussinermut ministeriaqarfik allamik ministerilerneqartariaqassaaq. Kinali tassani atorfinitsinneqassanersoq oqaatigiuminaappoq.
Inatsisinik atuutitsinermut ministeritut atorfik ministerimut socialdemokraatineersumut tunniunneqarnissaa ilimagineqarpoq. Nikolaj Wammen Henrik Sassilu maannakkorpiaq ilimanarnerpaapput, kisianni aamma imaassinnaavoq Thorning inuusunnerumaamik ministerinngortitsilluni misilereerusuttoq.
Thorning Nelson Mandelap eqqaaniarneqarneranut atatillugu Sydafrikamiippoq, angerlariarunilu naalakkersuisumi annaanniarnissaannik qinersinerullu tullissaanut ingerlaannarnissaanik suliniutigisariaqassavaa. Suliassaq, maannakkorpiaq unamminartupilussuartut isikkoqartoq.
