Danskit naalakkersuisui akissuteqartussanngorput
Amerikamiut isertortumik paasiniaasartuisa, CIA-p, Danmarkip taamatullu Kalaalit Nunaata silaannaa aqqusaarlugu tigusanik ilaasoqarluni timmisartumik ingerlaarsimanersoq, apeqqummut danskit naalakkersuisui akissuteqartussanngorput. Amerikami isertortumik paasiniaasartut ilaat qaffasissumik inissisimasoq, aviisimi Politikenimi ippassaq issuarneqarnermi, oqarpoq, igitsinimiup Abu Talai-ip amerikamiunit 1995-imi qimarngunneqarnera danskit oqartussaasuinit ilisimaneqarsimasoq. Abu Talai qimaasutut taamanikkut Danmarkimiippoq.
oktobarip 22-at 2007 05:18
-Takorloorsinaanngilara taamatut iliortoqarnerani Danmark oqaluttuunnatigu, Michael Scheuer taamani amerikamiut isertortumik paasiniaasarfianni CIA-mi tigusanik pilersaarusiortoqarnerani pisortaasoq oqarpoq.
Isertortumik tigusarinnittarnissamik pilersaarusiami Michael Scheuer siullersaalluni 1995-imi tigusaavoq, Kroatiami tikeraarnermini. Aviisimi Politikenimi allaaserineqartoq malillugu CIA timmisartuutiminik Danmarkip silaannaa aqqusaarsimassagaat.
Danmarkimi Folketingimi illuatungiliuttut piumasaqarput pineqartoq sukumiinerusumik misissoqqullugu, aammaarlunilu misissoqquneqarpoq, Danmarkip CIA timmisartuminik Kalaallit Nunaata silaannaanik mittarfeqarfinnillu atuisinnaanermik akuersisimanersoq misissoqqullugu.
