Danskit naalagaaffiat suleqataanerusariaqarpoq

Kalaallit Nunaanni meeqqat atugaannik pitsanngorsaaneq anguniarlugu danskit naalagaaffiat suleqataanerusariaqartoq Folketingimi amerlanerussuseqartut isumaqarput. Kalaallit Folketingimi aallartitaat siunnersuummut tapersersuipput. Akerliganilli Dansk Folkepartiip piumasaraa Kalaallit Nunaanni isumaginninnikkut suliuniuteqarneq sukumiisumik qalllunaat naalakkersuisuinit akuleruffigineqartariaqartoq.
Allattoq Jaaku Lyberth
februaarip 19-at 2008 10:26

Taamatut Dansk Folkepartiip oqallisissiatut saqqummiussinera Folketingimi partiinit tamanit tapersersorneqanngilaq.

Naalakkersuisooqatigiit partiillu sinneri Enhedslisten kisimik pinnatik tamarmik oqarput, Kalaallit Nunaanni isumaginninnikkut sulineq Namminersornerullutik Oqartussat suleqatigalugit isumaqatigalugillu ingerlanneqassasoq. Oqallinnermi partiit amerlanerussuteqartut oqarput, Kalaallit Nunaata Danmark-illu isumaginninnikkut suliniuteqarnermik isumaqatigiissutaat 2006-meersoq atuutiinnassasoq, isumaqatigiissutigineqartullu ingerlaannassasut.

Socialdemokratit folketingimi ilaasortaatitaat Julie Pilunnguaq Rademacherip Dansk Folkepartiip kisiartaalluni taamatut saqqummiussinerat, tusagassiuutitigut tusaqqusaarnertut taavai, aaqqiissutissanillu siunnersuuteqanngineri uparuarlugit. Julie Pilunnguaq Rademacherip erseqqissarpaa Kalallit Nunaanni illoqarfinni arlallinni isumaginninnikkut suliniutit ingerlammata.

Juliep tupigusuutigaa Dansk Folkepartii ukiuni kingullerni qulini folketingimi ilaasortaanerminni Kalaallit Nunaanni pisunik isumakuluuteqarsimanngitsut maannakkut isumaginninneq pillugu oqallititsinerat tusagassiuutititugut tusaqqusaarnerusoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq