Assi: Steen Brogaard

Danskit Ministeriat: Qimaasunut aningaasartuutit Kalaallit Nunaata akisussaaffigaa

Naalakkersuisut isumaqarput Kalaallit Nunaannut qimaasut amerlippata aningaasanik nassataqassasoq, danskilli ministeriunerat tamanna itigartippaa.

Kalaallit Nunaannut qimaasunik tigooraaneq innuttaaqataalertitsinerlu danskit nunanut allanut ministeriata Mattias Tesfayep oqaloqatigiissutigerusuppai. 

- Kalaallit Nunaannut qimaasunik siornatigut tigooraasimanngikkaanni tamassuma unammillernarsinnaanera paasisinnaalluarpara, ministeri oqarpoq.

AAMMA ATUARUK Erik Jensenip nunanit allaneersunik sulisoqarnissaq oqilisaanniarpaa

Ministerilli naqissuserpaa tamanna aningaasanik nassataqassanngitsoq.

- Maannakkutut inissisimasoqartillugu Kalaallit Nunaannut qimaasoq sulisoqarnermut isumaginninnermullu politikkip ataaniilissaaq, Mattias Tesfaye oqarpoq.

Suliffeqarnermut naalakkersuisoq, Erik Jensen, Mattias Tesfaye qaammatip aallartinnerani naapereerlugu tusagassiuutinut nalunaarpoq Kalaallit Nunaannut qimaasunik tigusineq aningaasartornikkut artukkiisinnaasoq.

Nunami inatsisit atuuttut nalinginnaasumik qimaasunut aamma atuupput

Naalakkersuisut qimaasunik tigusinerup aningaasanik nassataqartariaqarnissaa ima peqquteqartippaat:

- Nunanut allanut akisussaaffik suli Nunatta tigummisarilinngilaa taamaammat Naalakkersuisut isumaqarput tamanna danskit naalagaaffiata akisussaaffiinut suli ilaasoq, Erik Jensen allappoq.

Qimaasunut inatsisit:
Kalaallit Nunaat FN-ip qimaasunut inatsisaannut ilaavoq, tassani allaqqavoq nammineq nunagisami navianartorsiortitaagaanni ammip qalipaataa, upperisaq attuumassuteqarfilluunniit alla pillugu, taava nunanut allanut qimaasoqarsinnaavoq. Nunanut allanut qimaaniaraanni qinnuteqaat Danmarkimi Nunanut Allanut Ministeriaqarfiup suliarissuaa, tassani Kalaallit Nunaanniit sinniisoqarpoq Nunatsinnut attuumassusilinnut isumaginnittumik.
Una takuuk: https://danskelove.dk/udl%C3%A6ndingeloven/7 

Tassani danskit ministeriat isumaqataanngilluinnarpoq. Danmarkip nunamut qimaasutut isernissamik qinnuteqaatit suliarinissaat akisussaaffigigaa eqqorpoq, kisianni qimaasoq nunatsinni najugaqarnissamut akuerineqaruni nunatsinnullu tikilluni Danmarkimit akisussaaffigineqarunnaassasoq, Tesfaye isumaqarpoq.

- Uanga isumanni qimaasoq Kalaallit Nunaanni nunasisoq nalinginnaasumik nunami inatsisit atuuttut ataanniilissaaq inunnillu isumaginnittoqarfimmiit sullinneqartussanngussalluni, Tesfaye oqarpoq.

Kommunit ikiuunnissaminnut periarfissaqanngillat

Mattias Tesfaye inunnik isumaginninnermut suliffeqarnermullu akisussaafik Kalaallit Nunaanniit tiguneqarnikuunera tikkuarpaa, taamaattumillu kommunemi innuttaasut suliffeqarnissaat, ineqarnissaat allallu nunatta isumagisassaralugu.

Tamanna isumaqarpoq Nuummi qimaasumik innutaaqataasoqalerpat Kommuneqarfik Sermersuup akisussaaffigilissuaa nuuttut allat naligalugit. Inatsilli atuuttoq maannakkutut isikkoqartillugu qimaasup inissaanik oqaatsinillu ilinniarnissaanik kommunep neqeroorfigisinnaanngilaa.

Kalaallit politikerit arlallit aamma isumaqarput qimaasunik sullissisinnaalissagutta Nunarput innuttaaqataalersitsinermut inatsimmik immikkut ittumik peqartariaqartoq.

AAMMA ATUARUK Grønlands første flygtning: Flere partier opfordrer til ny lov

Tamanna Mattias Tesfayep eqqartorusuppaa.

- Innuttaasunngortitsinermut immikkut inatsisiliortoqassappat tassunga oqaloqataarusuppugut siunnersuillutalu.  

Danmark innuttaaqataalernermut inatsiseqarpoq 1999-miit atuutilersumik ukiut 20-nngortumik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat