Danskit isumaginninnermut ministeriata (S) naalakkersuisullu Martha Abelsenip (Siumut), nunatsinni meeqqat inuusuttullu ikiortariallit ikiornissaannut inassutit tamarmik 16-iusut timitalerneqarumaartut, naatsorsuutigaat.

Danskit ministeriat meeqqanut ikiuunneq pillugu: Inassutit tamarmik timitalerneqassapput

Nunatsinni Danmarkimilu atorfilittat nunatsinni meeqqanut inuusuttunullu ikiortarialinnut ikiuunnermut inassutit tamarmik timitalerneqarnersut alaatsinaassavaat.

Isumaginninnermut, Ilaqutariinnut Inatsisinillu Atuutsitsinermut Naalakkersuisoqarfimmi danskillu isumaginninnermut ministereqarfianni atorfilittat siuttuusut nunatsinni tamarmi meeqqat inuusuttullu ikiortariallit tamakkiisumik ilumut ikiorneqarnersut ukioq 2023 ilanngullugu alaatsinaassavaat.

Danskit isumaginninnermut nunamullu namminermut ministeriat, Astrid Krag (S), KNR-imut mailikkut taama ilisimatitsivoq. Naalakkersuisoq, Martha Abelsen (Siumut) tamatumunnga uppernarsaavoq.

Tassa imaappoq, atorfilittanut suliniutit pillugit ukiumut marloriarluni nalunaarusiortoqartassallunilu ikiuunneq qanoq sunniuteqarneranik ataavartumik naliliisoqartassaaq.

Nunatsinni isumaginninneq Namminersorlutik Oqartussanit akisussaaffigineqaraluartoq, Danmark nunatsinni meeqqanut inuusuttunullu ikiuunnermut 100 millionit koruunit missaannik 2019-imi aningaasaleereersorlu taama ilisimatitsipput.

AAMMA ATUARUK Martha Abelsen: Innersuussutit isornartorsiornerat kukkuluttorneruvoq

Pingaarnertut inassutit 16-it ikiuunnermi tunngavigineqassapput. Taakku ilaatigut naartusunik ikiuunnermut, angajoqqaanik pikkorissartitsinermut, ulluunerani paaqqinnittarfinni sulisut pikkorissartinneqarnerunissaannut kinguaassiuutitigullu pinerluuteqarsimasunik katsorsaanermut tunngapput. 

Inassutit 16-it oqaluttuassartaat
 

DR-ip Tasiilaq pillugu piviusulersaarut ”Byen hvor børn forsvinder” 2019-imi upernaakkut aallakaatippaa. Sumiginnaanerujussuaq, kinguaassiuutitigut atornerluineq aamma meeqqanut inuusuttunullu nakuusertarneq oqartussallu iliuuseqannginnerat piviusulersaarummi sammineqarput.


Naalakkersuisut nunatsinni meeqqanik inuusuttunillu ikiuunnissaq pillugu Danmarkimut ikioqqunisaannik Inatsisartuni amerlanerussuteqartunit tamatuma kingorna kimigiiserfigineqarput. Danmarkip tamatumunnga ukioq 2023 ilanngullugu aningaasaliissutiginiagai 100 millionit koruunit missiliorpaat.


Susassaqartut nunatsinneersut Danmarkimeersullu suleqatigiillutik tamatumani pitsanngorsaanissamut siunnersuuteqarput. Siunnersuutaat inassutini, nunatsinni meeqqat inuusuttullu ikiortariallit inuunerissaarnerulernissaannut suliniuteqarnermi tunngaviusussani, aallaaviupput.

Inassutit ilaatigut kommunit, politiit, Meeqqat Illersuisoqarfiat MIO, Pinerluttunik Isumaginnittoqarfik aamma ilinniartitaanermut peqqissutsimullu tunngasunik suliallit oqaloqatigereerneranni suliarineqarput.

Danmarkilli Naalakkersuisunut aningaasaliiniarnini ilutigalugu piumasaqaateqarnissaa, IA-mit Folketingimi ilaasortap, Aaja Chemnitz Larsenip, ujartorpaa.

- Danskit naalakkersuisui suliniutinik sunik aallartitsisimanitsinnik alaatsinaannissaat nakkutiginninnissaallu pingaaruteqarpoq. Immaqaluunniit aningaasaliissutit naalakkersuisut suliassaqarfimmi akisussaaaffigisaannut sinnaassaataaginnassappat? Aaja Chemnitz Larsen KNR-imut sapaatit akunnerata siuliani taama oqarpoq.

AAMMA ATUARUK Ataatsimut isigalugu: Meeqqanut inuusuttunullu atugarliortunut atatillugu innersuussutit 16-it

Suliniutillu aallarnisarneqareersut pinaveersaartitsinissamut tunngasut ikippallaartut, taanna aamma isumaqarpoq. Naalakkersuisulli danskillu naalakkersuisui isumaqataanngillat.

- Suliniutit taakku siusissukkut iliuuseqarnermut pinaveersaartitsinermullu aamma kommunit sulianik ingerlatseriaasiannik pitsanngorsaanissamut tunngapput. Taakkua meeqqat inuusuttullu ornittagaqarnissamik, Aaja Chemitz Larsenip aaqqiipallanneruallaarsorisaanik, pisariaqartitsilinnginneranni ikiornissaannut isumaginissaannullu iluaqutaasussat, danskit isumaginninnermut ministeriat, Astrid Krag (S) KNR-imut allappoq.

Inassutit 16-it siunnersuutitsialaannaanngillat

Danskilli naalakkersuisui aalajangersimasunik piumasaqaateqarsimanngitsut, naalakkersuisoq Martha Abelsen ilisimatitsivoq.

Kisianni inassutit 16-it suliarineranni suleqatigiilluarsimapput. Martha Abelsenilu isumaqarpoq, taakkua timitalerneqarumaartussatut naatsorsuutigisani siunnersuutitsialaannartut isigineqaratik suliniutitut aamma isigineqassasut.  

- Inassutit tamarmik timitalerneqarumaartut neriuutigalugulu upperaara. Taakkuninnga timitaliinissarput kommunit, susassaqartut meeqqallu kissaatigaat, taanna oqarpoq.

Inassutit 16-it tamarmik immikkut aningaasaliissuteqarfigineqarput.

Danskit isumaginninnermut ministeriat, Astrid Krag, KNR-imut mailerpoq ima:

- Inassutit tamarmik Kalaallit Nunaanni meeqqat inuusuttullu ikiortariallit ikilinissaannut sulinitsinnut ikorfartuutaallutillu iluaqutaassapput.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat