Danskit ministeriat atomip nukinganut tunngasunut apeqqut googlerlugu akissuteqarsimanerarpaa
- Allatut ajornartumik USA-p Nunatta sermersuata iluani Camp Century-mi nukissiorfeqarfigisimasaani qanorpiaq pisoqarsimanera erseqqissumik paasisariaqarparput.
- Danmarkip pisoqarsimaneranik ilisimasaqarsimanngippat aammalu ilisimasassani paasissutissanit kukkusuniit pissarsiariasarsimappagit ernumanartoqarluinnarpoq, tusagassiutinut nalunaarummini allappoq.
Sorsunnerup nillertup nalaani Camp Century sermersuup iluani Thule Air Basemit 250 kilometerinik kangisinnerusumiippoq.
Doris Jakobsenip apeqquteqaataanut nunanut allanut tunngasunut ministerip Martin Lidegaardip Folketingimut siusinnerusukkut akissuteqarnermini akissumminik naqqiissuteqarnerata kingorna, taassuma ernummateqarnera annerulerpoq.
Atomip nukinganik nukissiuutit Sikuiuitsumi Kujallermi USA-p atorsimasai arlalissuarnik najummatsernartunillu ajutoorfiusarsimanerat, Doris Jakobsenip taamani tikkuarpaa.
Ikummatissaq ulorianarluinnartoq Uran-235 atorsimavaat
Taama ajutoornerit Camp Century-mi aamma pisarsimasinnaanersut Doris Jakobsenip paaserusuppaa, Danmarkimili naalakkersuisut taamani akissumminni oqaatigaat Camp Centurymi ajornartorsiuteqartoqarsimanngitsoq, tamatumunngalu nassuiaatigalugu nukissiuutit taakku marluk assigiinngilluinnartunik ikummateqarsimanerat.
Tamannali ilumuunngitsoq Martin Lidegaardip maanna nassuerutigaa. Nukissiuutit Sikuiuitsumi Kujallermiittup aamma Camp Century-miittup ikummatissaq ulorianarluinnartoq Uran-235 atorsimavaat.
Ministeri peqqissaanngitsumik akissuteqarpoq
Pineqartumi taama ilungersunartigisumi ministerip taama peqqissaanngitsigisumik akissuteqarnera Doris Jakobsenip tupigusuutigaa.
- Ministereqarfik ullumikkut pitsaanerusunik ilisiasaqanngikkuni paasiniaalluni aallartittariaqarpoq, taamaasillutimmi siunissami eqqortunik paasissutissiisinnaalissammata.
- Ilami ernumanaqaaq atorfillit "google" atorlugu apeqqutigisakka ilungersunaqisunik imaqartut akiniartassappatigit. Danmarki taama kinguarsimatigisumik periuseqarluni Nunatsinni qinngornernik ulorianartunik atuinermi nakkutilliinerminik ingerlatsiniassappata, tamanna isornarluinnassaaq, Doris Jakobsen allappoq.
Taamaattumik atomip nukinganik nukissiuut Camp Centurymi atorneqarallarmat sermersuup iluani qanorpiaq pisoqarsimanerata misissuiffigineqarnissaa taassuma kissaatigaa.
Camp Centurymi atomip nukinganik nukissiuut kiassarnermut innaallagissamillu pilersuisuusoq, ingerlatinneqarnerata ajornartorsiutitaqarnera patsisigalugu 1966-imi atorunnaarsinneqarpoq.