Danskit meqqulinnik uumasuutillit peqatigiiffiat kamaammerpoq

EU-mi ilaasortaatitap puisinniarnermut akerliunera Danskit Meqqulinnik Uumasuutillit Peqatigiiffiata ernummatigaa.

Danskit Meqqulinnik Uumasuutillit Peqatigiiffiata atuagassiaani saqqummertumi kingullermi, danskit EU-mut aallartitaat Konservativimeersoq, Gitte Seeberg iluarinngeqalugu allaaserinnippoq. Gitte Seeberg Canadamiut puisinniarnerat pillugu, puisit amiinik piseqqusiunnaarnissamut siunnersuuteqarsimavoq. Danskit Meqqulinnik Uumasuutillit peqatigiiffiani siulittaasup Torben Nielsen-ip siunnersuut assut eqqumiigivaa. Birgitte Bardot-ip puisit pillugit tapersersortissarsiornikuuneranut, Kalaallit kulturiata tunngavianik aseruingajalluinnarnikumut eqqaasitsimmat.

- Gitte Seeberg taama kajumissaarinermigut inuiaqatigiit sanngiinnerit, inuiaqatigiillu avataanit pisunut sunnertiasorujussuit kingumut innarlerpai, atuagassiami allaatigisami pingaarnermi taama Torben Nielsen allappoq. Taanna

Meqqulinnik uumasuutillit Danmarkimi peqatigiiffiata isumaqarpoq kalaallit naalagaaffeqatigiinnermut ilaallutik, danskit EU-mut aallartitaasa, kalaallit nunaanni pissutsinik illersuinissaat ilimagisariaqaraluaraat.

Politikerit EU-mi ilaasortat puisit amiinik piseqqusiunnaarnissamik illersuisut, paasissutissanik ilumoortunik tunngaveqanngillat. Misigissutitilli pillugit iliuuseqartarput. Danskit Meqqulinnik Uumasuutillit peqatigiiffiani attaveqaqatigiinnermik pisortaat Sander Jakobsen taama oqarpoq.

- Politikerit paasisimasaqannginnerat pakatsissutigeqaarput, Sander Jakobsen oqaaseqaammini taama allappoq.

Danskit Meqqulinnik Uumasuutillit Peqatigiiffiata kalaallinut tapersiinera eqqumiiginarsinnavoq, isumaqartoqarsinnaammat imminnut illersorniarlutik tapersiisut. Piseqqusiunnaarnerummi kingunerisinnaammagu politikerit minkit amiinik aamma tuniseqqusaajunnaarnissaat. Ukiut tamaasa minkit amii 16 millionit missaaniittut Danmarkimi tunineqartarput. Puisilli tusindtit ikittuinnaat tunineqartarlutik. Danskit Meqqulinnik Uumasuutillit Peqatigiiffiat imminut illersorniarluni taama iliuuseqanngitsoq attaveqaqatigiinnermik pisortap Sander Jakobsen-ip oqaatigaa.

- Puisit amiinik oqallinnermi tunngavigineqartut pinerullugit taama oqaaseqarpugut.

Sander Jakobsen Danskit Meqqulinnik Uumasuutillit Peqatigiiffianeersoq oqarpoq.

Europamiut puulukiuteqartarnertik isornartorsiortariaqaraluaraat.

Oqallinneq uumasut peqqissuunissaannut, naalliutsinneqaratillu toqunneqartarnissaannut tunnganerusariaqarsorigamiuk.