Danskit meerarpalullutillu perruumaataartuupput

Danmark tassaaginnanngilaq H.C.Andersenip inunngorfia – aammali tassaavoq taassuma oqaluttualiaasa ilaanni nuna.

Taama isummersorfiusoq tassaavoq CBS-ip aallakaatittagaa, 60 minutes, TV2-kkut aallakaatinneqartartoq, nutaarsiassaqartitsivik nutaarsiassalerisarnermigut itisiliisarnermigullu nunarsuarmi tamangajammi tusaamaneqarnerpaanut ilaasoq.

Nyhavn kunngikkormiullu illorsuata Amalienborgip silataani paarsisut paarlaannerat aallakaatitami takutiitigalugit aviisiliortoq aperaaq: - Nunaarannguaq taanna alianaalluinnaqqissaartoq qanoq ililluni Kangiani Qiterlermi taamarsuaq eqqissiviilliortitsilersinnaasimanerpa?

Tamanna misissuiviginiarlugu TV-qarfiup CBS-ip tusagassiortoq Bob Simon Københavniliartissimavaa. Tusagassiortup taassuma paasisinnaanngorpaagooq eqqissiviilliornernut pissutaasut Danmarkimit sooq aallartissimanersut.

-Danskit inuiaat meerarpalulluinnarlutillu perruumaataartuupput, inuiaat imminnut kakkagisorujussuit, nunagisamik avataani susoqarneranik sianigisaqarpianngitsut, aviisi Danmarkimi ullormut saqqummersartoq, Politiken, issuaavoq.

- Danmark ukiut 50-it ingerlaneranni aatsaat taama ajornartorsiortigilerpoq. Sorsunnersuup kingulliup kingorna danskit nunaminnik asannittuullutillu inuunerissaarnissaminnik pingaartitsisuusimapput, minnerunngitsumik imminnut nuannaartorisuupput, amerikamiut inussiarnisaarput.

Sinnattuaqinerup piviusorsiornerullu sumiinnera Danmarkimi takujuminaappoq. Kunngikkut illorsuata silataani paarsisut allaanngillat pinngussat, aviisiliortoq Bob Simon oqarpoq.