Danskit Libanon-imi umiarsualiilerput
Naalagaaffiit Peqatigiit israelimiut hizbollah-kkullu Libanonimi sakkuaakkunnaarnerisa kingorna sakkutuuliinissaannut danskit tapersersuillutik pingasunik umiarsualiinissaminnut periareerput.
Danskit nunanut allanut ministeriat Per Stig Møller ullumi Folketingip nunanut allanut ataatsimiititaliaanik ataatsimeeqateqareerluni taama nalunaarpoq.
Libanonip kujasinnerusortaani anngortumik sakkunik eqqussuineq unitsinneqarsinnaaniassammat Libanonip sineriaani umiarsuarnik nakkutilliisussanik umiarsualiinissaq tapersersorneqarluarpoq, Per Stig Møller isumaqarpoq.
- Nukingertariaqarsorivugut. Nunat tamat sakkutuuliippata aatsaat israelimiut Libanonimit aniniarlutik nalunaaruteqareerput. Naalagaaffiit Peqatigiinnit kajumissaarneqarnissarput kisiat utaqqivarput, danskit nunanut allanut ministeriat Per Stig Møller oqarpoq.
Sakkutuut umiarsuaat "Peter Tordenskiold" umiarsuillu allat marluk, katillutik 150-inik inuttallit Folketingimi ilaasortat akuerseriarpata Libanonip sineriaanukartinneqassapput.
