Danskit kræfteqartut Tysklandimi katsorsarnerat pisortanit akilerneqartalissaaq
Taakkua ilagaat Ejner Hald 60-inik ukiulik Ålestrupimeersoq, Frankfurtimi tingummigut kræfteqarnerminik katsorsartinnerminut nammineerluni 200.000 koruuninik akiliisimasoq.
- Nappaatima anigornissaa qulakkeersinnaanngilara, maannakkut peqqippunga, neriuppungalu taamaakkallassallunga, toqunissannulli navianartorsiorpunga, taavalu nuliama akiligassakka isumagilissallugit, tamannalu nuannarivallaanngilara.
Peqqinnissamut qullersaqarfiup manna tikillugu Tysklandimi katsorsartittarneq akilissallugu itigartittuarsimavaa, maannali tassa Folketingimi peqqinnissamut ataatsimiititaliami amerlanerussuteqartut aningaaliinissamut periarfissaq ammaaffiginiarlugu oqaluuserilerpaat, taama oqarpoq Venstret peqqinnissaq pillugu oqaaseqartartuat Birgitte Josefsen.
- Katsorsartinnissap iluaqutaanera aamma qulakkeerneqassanngilaq, taamaattumilliuna peqqinnissamut ataatsimiititaliami isumaqartugut tamatumani napparsimasunit Tysklandimi katsorsartissimasunit saaffiginnissuterpassuit pissarsiarisimasavut eqqarsaatigineqartariaqartut.
Ataatsimiititaliap Jakob Axel Nielsen ataatsimiigiaqquaa suliassap Tysklandimit katsorsartittarnerup akuersissutigineqartussap aallartinnissaanut isumasiueqatigiumallugu.
