Danskit kalaallit oqaasii ilikkaruminaatsittarpaat

Danskiulluni kalaallisut erinarsornissaq oqalunnissarlu nalunarsinnaavoq.

Sisimiuni oqaatsinik ilinniarfimmi ullut 14-t danskit kalaallisut ilinniarnissaminnut periarfissinneqartarput.

Oqaatsinut ilinniarfimmi danskeq danskinut kalaallisut ilinniartitsisoq inuiaqatigiilerinermullu ilinniarsimasoq Klaus Georg Hansen aperaarput, sooq qallunaat kalaallit oqaasiinik ilinniartariaqassanersut.

- Ullutsinni politikkikkut piumasarineqarpoq Kalaallit Nunaanni kalaallisut oqaluttoqassasoq, siornatigut danskisut oqaluttoqarnerusaraluartoq, Klaus Georg Hansen oqarpoq.

Taanna nangilluni nassuiaavoq siornatigut ukiut 20-t matuma siorna danskisut oqaluttoqarnerujussuugallarmat suliffeqarfiit ingerlalluarlutillu pisarsimasut.

- Ullumikkut atuarfinni politikkikkut piumasarineqartut patsisaagunarlutik danskisut oqalulluarsinnaasut ikiligaluttuinnarput, Klaus Georg Hansen oqarpoq.

Taanna illuatungilerlugu aperaarput, illoqarfiilluunniit aqqisa taanissaat danskit ajornakusoortittaqimmassuk, ilumut danskit kalaallisut ilikkarsinnaanersut.

- Aap ilikkarsinnaavaat tamanna qularnanngilluinnarpoq! Taamatununa oqartarneq ileqquliutiinnarneqarsimasoq. Taanna aamma illuatungaanut saatissinnaavarput oqarluta, kalaallit danskit oqaasiinut nalornillutik ilikkarsinnaannginnerpaat, kisianni nalunngilarput taamaanngitsoq ilikkartarpaammi! Klaus Georg Hansen oqarpoq, nangipporlu:

- Oqaatsit taakku marluk assigiinngikkaluaqalutik ilikkarneqarsinnaapput. Danskit kalaallisut oqqarluttarnerannut imaluunniit kalaallisut ilikkaruminaatitsisarnerannut pissutaavoq danskit kalaallisut pinngitsooratik oqaluttariaqartannginnamik, kalaalerpassuimmi danskisut oqaluttarmata paaseqatigiipallattoqarsinnaasarmat .

Oqaatsinut ilinniarfiup ukiup ataatsip iluani qarasaasiaq aqqutigalugu oqaatsinik ilinniartitsineq misiligarpaa. Imalu ingerlallualersimatigaaq, marsip aallaaqqaataani aallartsivittussanngorluni. Sisimiuni sapaatip-akunnerini marlunni pikkorissareeraanni kingorna qaammatit marluk qarasaasiaq aqqutigalugu ilinniartoqarsinnaalissaaq.