Danskit kalaallillu isumaginninnikkut suleqatigiilerput
Danskit isumaginninnermut ministeriat Eva Kjær Hansen nunatsinnilu Ilaqutariinnermut Naalakkersuisoq Aleqa Hammond, nunatsinni isumaginninnikkut ajornartorsiutaasunik qaangiiniarluni suleqatigiinnissamik ullumi isumaqatigiissuteqarput. Nunatsinni naalagaaffeqatigiinnermut atasumi isumaginninnikkut ajornartorsiutaasut annertuut danskit naalakkersuisuinit isiginngitsuusaaginnarneqarsinnaajunnaarnerat suleqatigiinnissamut tunngaviusoq danskit isumaginninnermut ministeriat Eva Kjær Hansen oqarpoq. Suleqatigiissutigineqartussat pillugit Ilaqutariinnermut Naalakkersuisoq Aleqa Hammond ima oqarpoq:
-Naluneqanngitsutut meeqqat sumiginnakkat kinguaassiuutitigullu atornerlunneqarsimasut pillugit inuiaqatigiinni oqillinneq annertuvoq. Tamannalumi soorunalimi qallunaat nunaanni aamma arajutsisimaneqanngilaq, nalunngilaallu inuiaqatigiinni suliassat annertuut oqaimaatsullu nunatsinni massakkut atorivut. Tamannalu pillugu danskit isumaginninnermut minisreiat ikiuukkusulluni soqutiginnillunilu saaffiginnippoq.
Nunatsinni isumaginninnermi sulisussaqarniarneq ajornartorsiutaavoq annertooq. Inunnik isumaginnittunik perorsaasunillu amigaateqarnerujussuaq ilaatigut meeqqanik sumiginnakkanik ikiorserneqarnissannut sulianiarnermut kingunerluttarpoq. Meeqqanut kinguaassiuutitigut atornerlunneqarsimasunut suleriusissat amigaatigineqatarput, paasissutissallu pingaaruteqarsinnaasut pigineqartaratik, pissutsit taamaannerat pissutigalugu suliniarneq kipiluttunarsisartoq Aleqa Hammond erseqqissaavoq.
- Tassunga tunngatillugu qallunaat misilittakkaminnik siunnersuisinnaanissaminnik sulisutsinnik pikkorissaasinnaanissamik paasissutissanillu amigaateqartilluta isumaginnikkumnerannik isumaqatigiissuterput imaqarpoq.
Nunatsinni ajornartorsiutit pineqartut ukiorpassuarni atuunnikuupput, danskinit annertunerusumik akuliuffigineqaratik sulianiarnfigineqarlutik. Massakkulu aatsaat taama danskit tapersiinerat allamik aamma tunngaveqarpoq.
-Erseqqissaatigissavara meeqqat inuusuttullu sumiginnarneqarsimasut kinguaassiuutitigullu atornerlunneqarsimasut naalakkersuisooqatigiit isumaqatigiissusiornitsinni pingaartillugit atsioqatigiissutiginikuuagut, tamannalu danskit naalakkersuisuinit paasineqarpoq, isumaqatigiissuteqarnerup takutippaa suleqataassuseqarfeqaruttut sapinngisamillu tapertaarusuttut.
Ilaqutariinnermut Naalakkersuisoq Aleqa Hammond aamma oqarpoq suleqatigiinnermi pisariaqartitsineq naapertorlugu attaveqaqatigiittoqartassasoq suleqatigiinnissarlu immikkut piffissaligaanngitsumik aningaasallu killiliisarmata immikkut aningaasalersorneqarani ingerlanneqarniartoq.
