Danskit kalaallillu ilisimatusarneq pillugu isumaqatigiissuteqartut

Danmarkip Kalaallit Nunaatalu nunat taakku marluk akornanni ilisimatusarneq pillugu suleqatigiinnissamik isumaqatigiissuteqarput.
Assi © : Tusagassiivik
Allattoq Jonas Fievé
juunip 14-at 2016 07:23
Nutserisoq Erna Lynge

Danskit naalagaaffiat ukiumut 9 millionit koruuninik tassunga aningaasaliisassasoq Ilinniartitaanermut, kulturimut ilisimatusarnermullu naalakkersuisoq Nivi Olsen taama nalunaarpoq.

Kalaallit Nunaata silap pissusaa pillugu Pinngortitaleriffimmi ilisimatusarfiata aningaasaqarnissaa taamaalilluni qulakkeerneqarpoq, tamakkununnga ilaallutik Ph.d-ngorniartartut aamma postdocstipendiaqartartut.

Pinngortitaleriffiup pisortaa Klaus Nygaard aningaasaliiffigineqarnertik pillugu nuannaarpoq.

Danskit kalaallillu ilisimatusarnermi suleqatigiilluarnissaasa ingerlaannarnissaat isumaqatigiissutip qulakkeeraa Klaus Nygaard oqarpoq, ilanngullugulu oqarluni issittumi ilisimatusarnermi piginnaanngorsaaqqinneq ingerlaannarsinnaasoq.

Danskit ilinniagaqarnermut ilisimatusarnermullu ministeriata Ulla Tørnæsip Nunatsinnut sapaatip akunnerata siuliani tikeraarnerani isumaqatigiissut atsiorneqarpoq.

Politikkikkut oqaloqatigiinnerit saniatigut ministeri Kalaallit Nunaanni ilisimatusarnermi atukkat ilinniaqqittarnerillu pillugit nassuiaaneqarpoq, aammalu danskit kalaallillu issittumi ilisimatusarnerisa ilusissaannik 2016-ip ingerlanerani naammassisussaq pillugu nassuiaanneqarluni.

Nuup Kangerluanut ministeri aamma angallanneqarpoq, Silap pissusaa pillugu misissuisoqarfiup imaani ilisimatusarneranik nassuiaanneqarluni.