Issittup ukiuanut atasumik sermersuatsinnik ilisimatusaatigalugu misissuinissanut danskit aningaasaliinissaat, nunani assigiinngitsuni 15-ini utaqqikatanneqarpoq.
Sermersuarput pillugu ilisimatusaatigalugu misissuinissanut danskit aningaasaliiumanngikkunik Danmarki avataanit isiginerlutsilissagaat, issittoq pillugu ilisimatoorpassuit avoqqaarliuteqarput.
Issittup 2007-miit 2009-mut ukiuani ilisimatusarnissamut Canadap naalagaaffia katillugit 700 million koruuninik aningaasaliissuteqartoq, Norgemiut 350 million koruunik aningaasalissuteqarput.
- Naalagaaffiup aningaasaliingitsoornissaa ernummatigalugu maanna uipallilinngersaavugut, aningaasaliinngippami nunani allani ilisimaneqarnerput innarlerneqarujussuassaaq, taamaattumik neriuppugut naalagaaffik aningaasaliiumaartoq, Danmarkimi Niels Bohrip ilisimatusarfianeersoq professori, sermersuatta naqqa angullugu qillerisimanini pillugu tusaamasaasoq, Dorthe Dahl- Jessen oqarpoq.
Issittumut ukioritatimut atasumik nunatsinni misissuerusullutik suliaqarumasut nunanit 123-ineersut ukiup matuma naanngilaattaani naatsorsorneqarsimapput.