Danskit Irakimi siunnersuisuuniarnerat iluatsinngilaq

Danskit sakkutuui siorna aggustimi Irakimiit angerlarartinneqarmata, taarsiullugu sakkutuujunngitsut suliniarnerisa ataqatigiissaarnissaat patajaallisarniarlugu, Bagdadimi allaffimmiit danskinit qulinit Irakip ministereqarfiisa siunnersorneqarnerisigut anguniarneqaraluarpoq. Bagdadimili Nunanut allanut ministereqarfimmi marsip qaammataata tungaanut atorfeqarsimasoq, Hevi Babakhan isumaqarpoq siunniunneqartoq iluatsinngitsoortoq. - Nukinnik asuli atuineruvoq, immaqalu inuit inuunerannik akeqarluni, Babakhan oqarpoq. Malugineqarnaveersaarlutik suliakkiutigineqartut suliariniarsariinnarpaat, siunnersuisuuniartullu naalakkersuinermik suliallit akornanniinnaq inuupput, Irakermiorpianik takussanatik. Danskilli ineriartortitsinermut ministeriat, Ulla Tørnæs akerliliilluni oqarpoq, Irakimiut ministereqarfiisa innuttaminnit pitsaanerpaamik sullinneqarnissaat anguniassagaanni suleriaaseq ingerlanneqartoq iluarnerpaasoq.