Danskit inuusuttortaat chat-erusunnerusut
Danskit inuusuttortaat aqqaneq-marluk 20-llu akornanni ukiullit fjernsynernatik internetimi chatterlutik allanik oqaloqateqarusunnerusarput.
Inuusuttut inuusunnerusut fjernsynernatik interneterusunnerusartut misissuinerup PHD-mit ingerlanneqartup tamanna ersersippaa. Tamanna tupigusuutissaanngitsoq inuusuttut Københavnimi IT-Universitetimi ilinniartuusut oqaatigaat.
Maik aperineqarami sooq inuusuttut fjernsynernatik interneterusunnerusarnersut akivoq, interneti suleqatigiiffigineqarsinnaanerusoq, kammalaatit oqaloqatigineqarsinnaapput, pinnguaatinik pinnguaqatigiittoqarsinnaalluni assigisaanillu sammisaqaqatigiittoqarsinnaalluni. Fjernsynili tusagassiuutaavoq nammineq iliuuseqarani paasissutissanik “immertiffiusartoq”. Tamanna pissutigigunarlugu interneti inuusuttunit soqutigineqarneruvoq, Maik oqarpoq.
Maria aperineqarami sooq inuusuttut fjernsynernatik interneterusunnerusarnersut, akivoq inuusuttut internetimik qaqugukkut atuinissartik nammineerlutik aalajangersinnaagaat.
- Soorlu uanga You Tube atorlugu fjernsynerusunnerusarpunga, inuusuttoqatimalu suliaat internetimi takorusunnerusarlugit, Maria oqarpoq.
Inuusuttut Internetimi isiginnaarusunnerusartagaat tassaapput You Tube, Arto aamma My Space.
You Tubemi videut assigiinngitsut isiginnaarneqarsinnaapput, nittartagarlu taanna oqaatsit assigiinngitsut qulingiluat atorlugit isiginnaarneqarsinnaavoq qanittukkullu qallunaatut isiginnaarneqarsinnaalissalluni. Eqqaamaneqassajunnarsivoq You Tubemi upernaaq manna Silkeborgimi ilinniarnertuunngorniarfimmi ilinniartut iviangitik tamanut takusassiarimmatigik. Tassa assinik internetimut ilanngussisoqarsinnaasarpoq taamanikkulli videuliap You Tubemut ilanngunneqarnera qassiiliuutaaleraluarpoq.
