Danskit inuiattut erlinnartuutaat tillinneqarput
Danskit inuiattut erlinnartuutaasa ilaat imertarfiit nassuttut ilusillit kuultimik sanaat Jellingimi saqqummersitat ullaaq tillinneqarput. Imertarfiit kuultiusut taakku marluk allallu saqqummersitat akisuut angutinit tallimanit ullaassaq nalunaaqutaq tallimap qeqqa tillinneqarput.
Tassaqa Jellingimi siornatigut taamak amerlatigisunik tusagassiortoqarnikuua. Politiit tilliffiusup eqqaa siullermik qimmilerlutik qulimiguulinnillu ujarlerfigaat, kingusinnerusukkut teknikerit atallaalerlutik misissuilerput ungasinngitsukkullu aamma pujoralannaveeqqutinik anersaartuutilerlutik qassutaasanillu nasalersorlutik saqqummersitsiviup iluani misissuipput. Teknikerit immikkut misissueqqissaartartut aamma ullumi misissuiartussapput, tassami pinerlunneq naliginnaasuunngimmat tillitaallu immikkuullareqalutik.
Politeeqarfiup pisortaata tulliata Peter Theissenip oqaasii malillugit tillinniat majuartarfilerlutik qalianut qaqeriarlutik igalaaq aserorlugu isersimapput tassanngaaniillu saqqummersitsisarfimmut matut peqqarniitsumik aserorlugit iseriarlutik aamma saqqummersitsiviit igalaamerngit aserorsimagaat oqaatigineqarpoq. Inuit tillinniarnerup nalaani saqqummersitsiviup eqqaaniissimasut oqarput seqqortunik tusaasimallutik. Aallaasersortoqarsimanersoq qaartartulluunniit atorneqarsimanersut suli oqaatigineqarsinnnaanngilaq. Qaartartullu atorneqarsimappata teknikerit immikkut qaartartunik misissuisartut misissuiartortinneqassapput.
