Assi: KNR

Danskit inatsisaat pillugu tusarniaasoqaleruttortoq

Allagaatit tamanit pissarsiarineqarsinnaanissaat pillugu inatsimmut Peqatigiiffiit, tusagassiuutit soqutigisallillu isummernissaminnut maanna periarfissinneqarput.

Suliat Kalaallit Nunaannut tunngassuteqartut danskit akisussaaffigisaat, danskit inatsisaannut atassasut inatsisinik atortitsinermut ministereqarfiup kissaatigaa.

Taanna paasiniarniarlugu siunnersuut tamanut ammasumik Nunatsinni tusarniaassutigineqalerpoq.

Danskit inatsisaat tassunga tunngasoq atuutissanerpa, sulianut kalaallinut tunngasunut danskit oqartussaaffigisaanniittut?

Naalakkersuisut siulittaasuata naalakkersuisoqarfiata tamanut ammasumik tamanna apeqqutigaa.

Inatsit politikerinit eqiingaffigineqarpiarani siorna ukiakkut ataatsimiinnermi inatsisartunit akuerineqangajappoq.  Peqatigiiffiit suliniaqatigiiffiillu siunnersuut pillugu isummaminnik taamani tamanut ammasumik aperineqaqqaarsimanngillat.

Naalakkersuisulli siulittaasuata siunnersuut piffissaq kingulleq tunuartippaa, inatsisilerituut Nunatsinni peqatigiiffiat isornartorsiuimmat tamanut ammasumik peqataatitsisoqarsimannginnera pillugu.

Pisortat sulinerminni allagaataasa tamanit pissarsiarineqarsinnaanissaat pillugu inatsit Danmarkimi 2014-imi atuutilerpoq.

Taanna atuutilernerata siorna kingornalu assut isornartorsiorneqarsimavoq, ingammik tusagassiuutinit, ilaatigut ministereqarfiit periarfissimmagit paasissutissanik tusagassiuutinut avammut nalunaaruteqartariaqartinnagit.

AAMMA ATUARUK Inatsisissaq tusarniaassutigineqartariaqaraluarpoq

Ombudsmandip aamma uparuarsimavaa allagaatit tamanit pissarsiarineqarsinnaanissaat pillugu inatsisip pisortat allagaataannik takunnissinnaatitaaneq ajornarnerulissammat.

Folketinngittaaq inatsisip allanngortinnissaa maannakkorpiaq eqqarsaatigaa.

Danmarkimili inatsisinik atortitsinermut ministereqarfiup aalajangiusimavaa danskit allagaatit tamanit pissarsiarineqarsinnaanissaat pillugu inatsisaat Kalaallit Nunaanni Savalimmiunilu danskit oqartussaaffiinut atuutissasoq.

Inatsisissamut siunnersuut januaarip 30-ata tungaanut tamanut tusarniaassutigineqarpoq.

Danmarkimi tamanut tusarniaassutigereerneqareerpoq.
Inatsisissatut siunnersuut atuutilersinnagu Inatsisartuni Folketingimilu suliarineqaqqaartussaavoq.

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat