Nunat arfanniartartut japanimi ataatsimeeqatigiinnerannut danskit peqataatitaat nunanut allanut ministereqarfimmeersoq
Ole Samsing, danskit peqataanerannut akerliuniartunut, iluanaarutigalugulu arfanniartarnerup eqquteqqinneqarnissaanut akuersinissamut ernumassuteqartunut akissuteqarpoq.
- Iluanaarutigalugu arfanniartarnerup eqquteqqinneqarnissaanut isumatigiinniaqataanissatsinnik oqalunneq ilumuunngilaq, taamaattoqarnavianngilarmi, Ole Samsing erseqqissaavoq.
Japanimiut arfanniartarneq pillugu ataatsimeersuartitsinerannut nunat peqataatitaqarumanngitsut ilaatigut tassaapput: EU, USA, Australia New Zealandilu. Ataatsimeersuarnissamut qaaqqusaasimapput arfanniarneq pillugu ataatsimiititaliarsuarmi IWC-mi ilaasortat 72-it, taakkunanngali 35-iinnaat peqataapput. Danskillu peqataanertik annakannajaassutigilersinnaagaat nutaarsiassaqartitsivimmi Ritzaumi allaaserineqarpoq. Ole Samsing oqarpoq IWC-mi avissaartuuttoqalinnginnissaa anguniarlugu danskit peqataasut.
- Tassami Japanimiut arfattassiisarnermut uteqqikkusupput, uagullu naapittoqarnissaa angorusupparput, taamaattumilluuna iluarineqanngitsugut, Ole Samsing oqarpoq.
Japanimiut Norskit Islandimiullu arfattassinneqartalernissamik kissaataat piviusunngorsinnaavoq IWC-mi ilaasortat pingajorarterutaat akuersippata.
- IWC-milu isumaqatigiittoqarsinnaanngippat ataatimiitaliaq atorunnaarsinnaavoq, kikkullu piumasattaannguartik naapertorlugu iliorsinnaalissallutik, taamaattumilluuna uagut naapititsiniaasugut, Ole Samsing Ritzaumi taama issuarneqarpoq.