Danskit illersornissamut ministeriat narrutsassimavoq

januaarip 20-at 2006 15:41

Kangilinnguanut timmisartuussisarneq Danmarkimi politikerinit oqallisigineqalerpoq. Timmisartuussisarnerup ajorseriarnerata kingunerisinnaasai Namminersornerullutik Oqartussanit eqqarsaatigineqartariaqarput, illersornissamut ministeri oqarpoq. Aalajangiisoqartinnagu tusarniaasoqarsimannginnera Søren Gadep eqqarsarnartoqartippaa. Massakkullu pissutsit ilungersunarnerarlugit:

- Massakkorpiaq angalannerup ajorseriarsimanera Kalaallit Nunaanni innuttaasut arlaannaataluunniit iluaqutiginngilaa, Danmarkimi illersornissamut ministeri Søren Gade Venstreneersoq taama oqarpoq. Nangipporlu:

- Kalaallit Nunaanni sakkutooqarfiup ulluinnarni suliassai ajorluinnartumik eqqorneqarsinnaammata Namminersornerullutik Oqartussanit attaveqarfigineqarnissara utaqqiinnarpara. Namminersornerullutik Oqartussanit isumasiorneqarsimannginnama angallannerup allannguiffiginissaa ilisimasimanngilara.

Sakkutooqarfimmi sulisut angallatit nakkutilliissutaasut Kangilinnguaniit Narsarsuarmukartut ilaanni ilaaffigisarpaat sivisuumik angalanissartik pinngitsoortinniarlugu. Nakkutilliissutinullu ilaaneq nalunaaquttap akunneri aqqaneq-marlunnik sivisussuseqartarluni. Taamatut aalajangerneq ajorluinnartumik inuiaqatigiinnut kinguneqarsinnaavoq, illersornissamut ministeri, Søren Gade oqarpoq nangillunilu.

- Kangilinnguani suliarisartakkagut tamakkiisumik suliarisinnaanngilagut. Aalisarnermi nakkutilliinerput, ajoqusersimasunillu ikiuigasuartarnerput eqqorneqarput. Tamakku Namminersornerullutik Oqartussanit sapinngisamik pitsaanerpaamik suliarineqartarnissaat isumaannartariaqarpoq.

- Namminersornerullutik Oqartussat sumi timmisartuussisoqassanersoq aalajangiiffigisarpaat, taamaattumik naalagaaffimmit tapiiffigineqarnissartik ilimagissanngilaat, aamma aalajangiisoqannginnerani ilisimatinneqarsimannginnera eqqumiiginarpoq, Søren Gade oqarpoq.

- Ukiarmi Kalaallit Nunaannikkama Kangilinnguanut angallannerup allannguiffiginissaanik arlaannataluunniit ilisimatinngilaanga. Taamanikkut arlaata oqarfigisinnaagaluarlunga oqarfiginngilaannga, illersornissammut ministeri Søren Gade naggasiivoq.