Danskit ilisimasaqannginnerarlutik oqarnerat upperinngilaa
- Timmisartuussisarsimanernik danskit naalakkersuisui ilisimasaqarsimannginnerat upperisinnaanngilara, USA-mi naalakkersuisuusimasuni qaffasissumik atorfeqarsimasoq, Lawrence Wilkerson, aviisimi politikenimit taamatut issuarneqarpoq.
Lawrence Wilkerson Amerikami nunanut allanut ministeriusimasup Colin Powellip atorfilittaasa pisortaraat.
Taassuma erseqqissarlugu oqaatigaa, CIA-p tigusanik timmisartuussisarnera pillugu ataatsimiittarnerni peqataasarsimanani, taamaattumillu tigusanik timmisartuussisarnernik ilisimasaqarani.
Taamaattorli Colin Powellip nunanut allanut ministeriunerata nalaani sakkutuut suliaqarneranni peqataasarsimanerarpoq, aammalu amerikamiut isertortumik paasiniaasartui CIA suleqatigalugit, Lawrence Wilkerson oqarpoq.
- CIA nunat allat silaannartaat aqqusaarlugit timmisartumik ingerlaarniaraangami nunat taakkua akuersiteqqaartarpai, Lawrence Wilkerson oqarpoq.
Isornartorsiuteqarneq pillugu nunanut allanut ministeriusimasoq maannakkullu kulturimut ministeri Per Stig Møller oqaaseqarusunngilaq.
Nunanut allanut ministeri Lene Espersen aammalu danskit politiivisa illersornissamullu oqartussaasut paasiniarsartui, maannakkut naalakkersuisuusut oqaatigeriigaat, tassalu CIA-p timmmisartuussisarsimaneranik ilisimasaqannginneranik oqarnerat innersuussutigaat.
