Danskit filmiliaat Oscarinnaratarsinnaavoq
Ukioq manna filmiliortunut nersornaasiuttakkat nuimanersaannut piukkunneqartut nalunaarutigineqaqqamipput, tassalu "Hævnen", spaniamiut filmiliaat "Biutiful" peqatigalugu, filmit nunanit allaneersut pitsaanersaattut nersornaasigassatut piukkunneqarpoq.
'Hævnen" Golden Globemik sapaatiummat nersornaaserneqarmat Osarimut piukkunneqarnissaa aamma eqqoriarneqartalerpoq. Golden Globemimmi nersornaaserneqartartut aamma Oscarimik nersornaaserneqakkajupput.
Danskit filmiliaat kingullermik Oscarinnattussatut piukkunneqarpoq 2007-imi aamma taamani Susanne Bierip filmiliaa "Efter brylluppet", "Katinnerup, kingorna" piukkunneqarluni.
Filmi danskisut taaguutilik "Kongens store tale" nersornaasiissutinut aqqaneq-marlunnut piukkunneqarpoq, filmi "True Grit" qulinut kiisalu filmit "Inception" aamma "The Social Network" tamarmik arfineq-pingasunik nersornaaserneqartussatut piukkunneqarlutik. Hollywoodimi, The Kodak Theatre-mi Oscarinnattussat februaarip 27-anni persuarsiutigineqassapput.
