Danskit erfalasuat ikuallanniarneqarpoq

Israelimi arsaannermik nuannarisallit tallimanngorpat Israelimi 1. divisionimi unamminissaq sioqqullugu danskit erfalasuat ikuallanniarpaat.

Taama nalunaaruteqartoqarpoq, Danmarkip Isralimut unamminissaa sapaatit-akunnerinik marlunnik sioqqutiinnartorlu.

Israelimi aviisit annerit ilaat ippassaq allaaserisaqarput arsaannermik nuannarisallit arabiamiut isralimiullu klubbiannut Bnei Sakhnin-imut illersuisut Nazareth-iminngaanneersunut unammilerpata, danskit erfalasuat ikuallanniarlugu. Klubbi Bnei Sakhnin Sakhnin-imi angerlarsimaffeqarpoq, tassanilu muslimerpassuit najugaqarput.

Danskit nunanut allanut unammisartui nalunaaruteqareersimapput israelimiunut unamminissartik toqqissisimassutiginagu.

Paasisat nutaat DBU-mit qisuariarfigineqanngillat. Kattuffik nalunaaruteqareernikuuvoq marlunngorpat aatsaat unamminissaq aalajangiiffiginiarlugu.

-Danskit ilisimatuuinit innersuussutigineqartut malissavagut, allamik naamik, DBU-mi generalsekretæri Jim Stjerne Hansen oqarpoq, taassuma politiit naalagaaffiup isortortumik paasiniaasartuisa naliliinissaat aamma utaqqivaa.

Danskit erfalasuannik ikuallaaniarneq muuamaamik titartakkanut akerliunermik peqquteqarpoq.

Muuamaamilli titartakkanik akerliunerujussuaq unikaallakkiartorunarpoq. Danskit nunanut allanut ministeriaqarfiata Marokko-mut Tunesiamullu angalaniarnerit unitsinnikuusaraluatik ammaateqqissimavaat.

Angalatitseqatigiiffiup MyTravel-ip marsip aallartinnerani Marokko-liarniat siulliit aallartissavaat, suliffeqarfiup tuniniaanermi pisortaa Jan Vendelbo oqarpoq.