Danskit eqqumiitsuliortut Myanmar-imi tinnersaasut

Danskit eqqumiitsuliortut suleqatigiit Surrend aammaarlutik kisermaassillutik naalakkersuisut killilersuinerat pitarlugu takoqqusaarusioqqissimasut Ritzau-imi allaaserinnittoqarpoq.

Maanna taamatut takoqqusaarusiorfigineqartoq tassaavoq naalagaaffik Myanmar, siornatigut Burma-tut taaguuteqartoq.

Aviisimi tuluttut saqqummertartumi Myanmar Times-imi ataasinngornermi saqqummersumi takoqqusaarummi naalagaaffiup siuttua, general Than Shwe toqoraasutut taaneqarpoq.

Takoqqusaarut pasinanngivissoq takornarianut Skandinaviameersunut saaffiginnittutut isikkoqarpoq, tassani orpimmik palme-mik seqinermillu titartagartaqarpoq imalu allassimasumik allagartaqarluni: “Myanmar nuna kusanartoq inuilu inussiarnersut”.

Quppernerup naqqani takoqqusaarusiortut ilaatigut nalunaarsimallutik Islandimi angalatitseqatigiiffik Ewhsnahtrellik, taannalu oqaaseq eqqumiitsoq tunuaniit atuaraanni tuluit oqaasii ukua atuarneqarsinnaapput: “Killer Than Shwe” isumaqartoq, “toqoraasoq Than Shwe”.

Eqqumiitsuliortut suleqatigiit Surrend siorna decembarimi naalagaaffiup nakkutigisaani Iranimi Teheran Times-imi takoqqusaarusiorput Iranimiut præsidentiata, Mahmoud Ahmadinejad-ip, assingata ataanut “puuluki”-mik allagartalimmik.

Pia Bertelsen Surrend-imeersoq oqarpoq suleqatigiit kisermaassillutik naalakkersuisut qanorluunniit ingasatsigigaluaraangata aqqutissaqartuaannartoq takutinniarneqartoq. Aqqutissallu nassaarinissaat apeqqutaaginnarpoq.