Danskit katillugit 23.763-it coronavirusimut misissorneqarput. Misissuinerillu iluaqutsiullugit coronamik tunillatsissimasut 2815-it paasineqarput.Assi: Ida Guldbæk Arentsen/Ritzau Scanpix

Danskit coronavirusimik tunillatsissimallutik toqusut 13-inik amerlisut

Danmarkimi coronamik tunillatsissimasullutik napparsimmavimmi uninngasut ataasinngornermiit marlunngornermut 529-nngorput.

Danskit coronamik tunillatsissimasut kingornalu toqusut amerliartuinnavipput.

Virusimik tunillatsissimanermi kingorna toqusut marlunngornermi 90-iupput. Taakku ullup siulianut naatsorsuinermut sanilliullugu 13-inik amerlanerupput. Statens Serum Institut paasissutissiivoq.

Coronamilli tunillatsissimasut napparsimmavimmi uninngasut sapaatini akunnerni kingullerni amerliartuinnarsimagaluartut ikilipput. Coronaviruseqarnertik pissutigalugu napparsimmavimmi uninngasut marlunngornermi 529-upput, taakkulu ataasinngornermut sanilliullugit sisamanik ikinnerupput_

Napparsimmavimmi uninngasunit 529-nit 145-t peruluttut uninngavianniipput. 145-niillu 131-t perlungaaramik anersaartuummik atortulerneqartariaqarlutik.

AAMMA ATUARUK Danskit coronavirusimik tunillatsissimallutik toqusut tallimanik amerlisut

Napparsimmavimmi uninngasut anersaartuuteqartariaqartullu marlunngornermi amerlassusaat ataasinngornermut sanilliullugu amerlanerupput. Tassa ataasinngornermi peruluttut uninngavianniittunit 137-nit 119-it anersaartuummik atortoqartariaqarput.

Coronavirusimik tunillatsinnermi kingornatigut napparsimmavimmut unitsinneqartariaqartuni angutit arnanit amerlanerupput. Uninngasunit 529-nit 316-init angutaapput.

Danskit katillugit 23.763-it coronavirusimut misissorneqarput. Misissuinerillu iluaqutsiullugit coronamik tunillatsissimasut 2815-it paasineqarput.

Naallu oqartussat innuttaasunik amerlanerusunik misissuilerniarlutik oqaraluartut tunillatsissimasunik paasineqanngitsunik amerlasuunik peqarnissaa ilisimaneqarpoq, tassami tunillatsissimasut ersiuteqanngitsut tamarmik misissorneqartannginnamik.

Danskit oqartussaasuisa virusimik tunillatsissimasut qassiunersut suli tamanut saqqummiutinngilaat.

Tamannalu siullermik sapaatip-akunnerani matumani saqqummiunneqarnissaa naatsorsuutigineqarpoq.

AAMMA ATUARUK Mette Frederiksenip Danmarki poorskip kingorna immaqa ammaqqissaneraraa

Ministeriunerup, Mette Frederiksenip (S) amerlanerusunik coronamik tunillatsittoqarumaartoq qassiiusullu virusimik tunillatsissimanerminni toqujumaartut tusagassiortunik ataasinngornermi katersortitsinermini oqaatigaa.

Coroviruseqartoqarnerata akiorniarnerani suliniutit qassiiusut iluaqutaajartulerput, tamatumalu kingunerisaanik Danmark nakkutigilluagaasumik poorskip kingorna ammaqqissinnaanissaanik kinguneqarsinnaasoq ministeriunerup oqaatigaa.

/ritzau/

Isummersuutit