Danskit aviisii: Tapiissutip taartissaa Naalakkersuisut ujartortariaqarpaat

Danmarkimi Aviisit ullormut saqqummersartut Kattuffianni pisortap, Ebbe Dalip, Naalakkersuisut siulittaasuannut ammasunik allakkamini avoqqaaraa oqarluni, aviisit nassiunnerinut tapiissut ukiortaamiit peerneqarpat tamanna kalaallit aviisiinut millionit koruuninik naleqassasoq.

Taamaammat Ebbe Dalip Kuupik Kleist kajumissaarpaa aviisit nassiunnerinut tapiissutip taartissaanik nassaarniaqqullugu.

Allakkani ammasuni ima allassimavoq:

Tuniniaanissamut piumasaqaatit Kalaallit Nunaanni allakkeriviit ullutsinni malittarisussaavaat, taamaammat aviisit akiisa allanngortinnissaannut aalajangerneq immaqa allanngortinneqarsinnaanngilaq. Kalaallit Nunaannili Naalakkersuisunut pisariaqalersinnaavoq tamassuma malitsigisassaanut taartaasussamik ujartuinissaq.

Danmarkimi Aviisit ullormut saqqummersartut Kattuffianni siulittaasup oqarnera naapertorlugu, eqqugaasunut ilaasinnaavoq aviisi Sermitsiaq, tassanimi aaqqissuisoqarfimmeersut pingasut soraarsinneqartariaqarsinnaapput.