Danskit aviisiat: Qinersinermi meeqqat ajugaapput

Meeqqat sumiginnaagaasut eqqarsaatigalugit inatsisartunut qinersinermi inernerit nuannaarutissaapput, meeqqammi siunissaat qaamanerusutut isikkoqarsinnaammat, Perorsaasut Ilinniarsimasut Peqatigiiffianni siulittaasoq Kaaliina Skifte, aviisimut Kristeligt Dagbladimut oqarpoq.
juunip 04-at 2009 07:44

- Kalaallit Nunaanni nutaamik pisoqalersoq malunnarpoq. Namminersulernissaq eqqarsaatigalugu ajornartorsiutit iliuuseqarfigineqarnissaat akisussaassuseqartumillu takutitsinissaq pingaaruteqarpoq, tamannalu maanna pigaluttualerpoq, PIP-p siuittaasua oqarpoq.

Meeqqat pisinnaatitaaffii pillugit suliniaqatigiiffik Red Barnet assinganik isumaqarpoq. Red Barnetimi suliniutinik ataqatigiissaarisup Dorrit Hermannip oqaatigaa allannguinissaq matumani anguniarneqartoq, inuiaqatigiit ataatsimut isigalugit aaqqiiniartoqarnera taassuma tikkuarpaa, inuit ataasiakkaat pineqaratik.

- Meeqqat Kalaallit Nunaanniittut allannguisoqarsinnaanissaa nuannaarutigisariaqarpaat, Dorrit Hermann Kristeligt Dagbladimut oqarpoq.

Kalaallit Nunaanni qinersineq Amerikamiut Barack Obamamik nuannaartorinninnerannut, Air Greenlandip pisortaata Michael Binzerip sanilliuppaa:

- Inuiaqatigiinni aaqqinniagassat pillugit aallaqqaammut takorluugaqartoqartarpoq. Ajornartorsiuterpassuaqartoq nalunngilarput, soorlu nunani siuarsarniagassani taamaattoqartoq. Ajornartorsiutilli ukiorpassuarni aaqqiivigineqarsimanngillat. Takorruuisinnaasumik maanna siuttoqalerpugut, neriulluarpugullu, Michael Binzer oqarpoq.

Ajornartorsiutilli imaaliallaannarlugit aaqqinneqarnavianngitsut apersorneqartut tamarmik isumaqarput.

- Ilaqutariilli meerallit pillugit, ilinniartitaanerullu pitsanngorsaavigineqarnissaa, meeqqallu sumiginnagaasimasut pitsaanerusumik sullinneqarnissaat, qinikkat nutaat suliniutigissagaat qularutiginngilara, Dorrit Hermann, Red Barnetimeersoq, Kristeligt Dagbladimut oqarpoq.